استانا قالاسىنىڭ مامانداندىرىلعان اۋدانارالىق قىلمىستىق سوتى «قازسپەتسەكسپورت» رەسپۋبليكالىق مەملەكەتتىك كاسىپورنىنىڭ بۇرىنعى باسشىلارىنا قاتىستى ۇكىم شىعاردى. ولار اسكەري ماقساتتاعى ونىمدەردى ساتىپ الۋ بارىسىندا بيۋدجەت قاراجاتىن جىمقىردى دەگەن ايىپپەن سوتتالدى، دەپ حابارلايدى “ادىرنا”.
قارجى مونيتورينگى اگەنتتىگىنىڭ حابارلاۋىنشا، كاسىپورىننىڭ بۇرىنعى باس ديرەكتورى ارمان رامازانوۆ 11 جىلعا باس بوستاندىعىنان ايىرىلدى. ال يمپورت دەپارتامەنتىنىڭ ديرەكتورى ازات قۇداباەۆ 10 جىلعا سوتتالدى. سونىمەن قاتار، وسى قىلمىستىق ىسكە قاتىسى بار تاعى توعىز ادام ءتۇرلى مەرزىمگە باس بوستاندىعىنان ايىرىلدى.
سوت مەملەكەت مۇددەسىندە 1,6 ميلليارد تەڭگە (شامامەن 3 ملن اقش دوللارى) كولەمىندەگى ماتەريالدىق شىعىندى وتەۋ تۋرالى تالاپتى قاناعاتتاندىردى. سونىمەن بىرگە، ايىپتالۋشىلاردان 607 ميلليون تەڭگە (شامامەن 1,1 ملن اقش دوللارى) تۇراتىن مۇلىكتى تاركىلەۋ تۋرالى شەشىم شىعاردى.
اتالعان ۇكىم ءالى زاڭدى كۇشىنە ەنگەن جوق.
ايتا كەتەيىك، 2023 جىلى كۇشتىك قۇرىلىمدار «قازسپەتسەكسپورت» قىزمەتكەرلەرى مەن ولاردىڭ سەرىكتەس جەتكىزۋشىلەرىن ۇستاعان بولاتىن. تەرگەۋ مالىمەتتەرى بويىنشا، كاسىپورىن باسشىلىعى مەن اففيليرلەنگەن تۇلعالار شەت مەملەكەتتەردەن اسكەري تەحنيكا ساتىپ الۋ كەزىندە تاۋارلاردىڭ باعاسىن قولدان كوتەرىپ، مەملەكەتتىك قاراجاتتى ماقساتسىز جۇمساعان. تەرگەۋ ماتەريالدارىندا كەلتىرىلگەن شىعىن كولەمى 1,6 ميلليارد تەڭگەدەن اسقان.
سونىمەن قاتار، كاسىپورىن باسشىسى قىزمەتىن ۋاقىتشا اتقارعان ارشات اياعانوۆ تا سوتتالعانى بەلگىلى. ول قىزمەت بابىن اسىرا پايدالاندى دەگەن ايىپپەن 4 جىل 8 ايعا باس بوستاندىعىنان ايىرىلدى. بۇل ۇكىم 2025 جىلدىڭ قاڭتارىندا شىققان بولاتىن.
