تۇركىستان وبلىسىندا شارتتى تۇردە بوساتىلعان بلوگەر مۇرات ءابدىلدا قايتادان قاماۋعا الىندى، دەپ حابارلايدى “ادىرنا” ۇلتتىق پورتالى.
تۇركىستان قالاسىنىڭ اۋدانارالىق سوتىندا قر قىلمىستىق كودەكسىنىڭ 174-بابىنىڭ 1-بولىگىمەن 2022 جىلى سوتتى بولعان مۇرات ابدىلداعا قاتىستى ۇسىنىم قارالدى.
ساۋران اۋداندىق پوليتسيا ءبولىمى بلوگەردىڭ مەرزىمىنەن بۇرىن شارتتى تۇردە بوساتۋدىڭ كۇشىن جويىپ، جازانىڭ قالعان وتەلمەگەن بولىگىن باس بوستاندىعىنان ايىرۋ تۇرىندەگى جازاعا اۋىستىرۋدى سۇراعان.
«مۇرات ءابدىلدانى مەرزىمىنەن بۇرىن شارتتى تۇردە بوساتۋدىڭ كۇشى جويىلىپ، جازانىڭ قالعان وتەلمەگەن بولىگى 2 جىل 11 كۇنىن باس بوستاندىعىنان ايىرۋ تۇرىندەگى جازاعا اۋىستىرىلدى»، — دەپ مالىمدەدى پوليتسيا.
ەسكە سالساق، مۇرات ءابدىلدا الەۋمەتتىك ارازدىق تۋدىرعانى ءۇشىن تۇرمەگە قامالعان بولاتىن. 9 قىركۇيەكتە ول بوستاندىققا شىققان ەدى.
