ماسكەۋدىڭ مەششان اۋداندىق سوتى ساياساتكەر ءارى قوعام قايراتكەرى ميحايل حودوركوۆسكيگە سىرتتاي ۇكىم شىعارىپ، ونى 10 جىلعا باس بوستاندىعىنان ايىردى، دەپ حابارلايدى «ادىرنا» ءتىلشىسى DW-گە سىلتەمە جاساپ.
شەشىم رەسەي قارۋلى كۇشتەرىن پايدالانۋ تۋرالى جالعان اقپارات تاراتۋ ءىسى بويىنشا شىعارىلعان. پروكۋراتۋرا وعان 14 جىل جازا سۇراعان، ال قورعاۋ تاراپى ونى اقتاۋدى تالاپ ەتكەن.
سوت قوسىمشا جازا دا تاعايىنداعان، حودوركوۆسكيگە 5 جىل بويى ينتەرنەتتە اقپارات جاريالاۋعا، سونداي-اق سايتتار مەن باسقا دا ونلاين-رەسۋرستاردى باسقارۋعا تىيىم سالىندى.
قىلمىستىق ءىستىڭ نەگىزىنە 2022 جىلدىڭ قىركۇيەگى مەن 2024 جىلدىڭ شىلدەسىندە جاريالانعان ماتەريالدار الىنعان. اتاپ ايتقاندا، الەۋمەتتىك جەلىدەگى رەسەيدىڭ سوعىستاعى ىقتيمال شىعىندارى تۋرالى جازبا جانە كيەۆتەگى «وحماتدەت» بالالار اۋرۋحاناسىنا جاسالعان سوققى جونىندەگى YouTube ۆيدەوسى قاراستىرىلعان.
پروكۋراتۋرا بۇل ماتەريالداردا رەسەي ارمياسىنىڭ ارەكەتتەرى تۋرالى «كورىنەۋ جالعان اقپارات» قامتىلعان دەپ ەسەپتەيدى.
ايتا كەتەيىك، قازىرگى تاڭدا ميحايل حودوركوۆسكي ۇلىبريتانيادا تۇرادى.
