30 قازاندا سەمەي قالاسىندا وبلىستىق سوت عيماراتىنىڭ الدىندا ءوزىن ورتەپ، كوز جۇمعان ەر ادام شەتەل ازاماتى بولعان، دەپ حابارلايدى “ادىرنا”.
ول قىلمىستىق ءىس بويىنشا جابىرلەنۋشى رەتىندە تانىلعان.
وبلىستىق سوتتىڭ مالىمەتىنشە، 2020 جىلى جابىرلەنۋشىگە تيەسىلى كومپانيا ليزينگتىك كومپانيامەن بەس ساموسۆالدى ساتىپ الۋ تۋرالى كەلىسىمشارت جاساسقان. الايدا كولىكتەردىڭ اقىسىن تولىق تولەمەگەن.
2024 جىلى ليزينگتىك كومپانيانىڭ اتىنان ارەكەت ەتكەن ايىپتالۋشى سوت شەشىمىنسىز ءتورت ساموسۆال مەن قوسالقى بولشەكتەردى اكەتۋدى ۇيىمداستىرعان. بۇل ارەكەت ءوز بەتىنشە بيلىك ەتۋ دەپ باعالانعان.
سوت ونى قىلمىستىق كودەكستىڭ 389-بابىنىڭ 1-بولىگى بويىنشا كىنالى دەپ تانىعان. الايدا قىلمىستىق جاۋاپكەرشىلىككە تارتۋدىڭ ەسكىرۋ مەرزىمى وتۋىنە بايلانىستى ول بوساتىلعان.
بۇعان دەيىنگى كەلىسىمشارتتار تولەمنىڭ تولىق جۇرگىزىلمەۋىنە بايلانىستى بۇزىلعاندىقتان، سوت تەحنيكانى زاڭدى يەسى – ليزينگتىك كومپانياعا قايتارۋ تۋرالى شەشىم شىعارعان.
سونداي-اق جابىرلەنۋشى جوعالعان قۇرال-جابدىقتار، قوسالقى بولشەكتەر جانە بەسىنشى ساموسۆالدى جوندەۋگە كەتكەن شىعىن ءۇشىن 19,9 ميلليون تەڭگە ءوندىرۋدى سۇراپ، ازاماتتىق تالاپ ارىز بەرگەن.
الايدا مۇلىكتىڭ وزىنە تيەسىلى ەكەنىن جانە كەلتىرىلگەن شىعىن كولەمىن راستايتىن دالەلدەر جەتكىلىكسىز بولعاندىقتان، سوت تالاپ ارىزدى قاراۋسىز قالدىرعان. سونىمەن قاتار جابىرلەنۋشىگە شىعىندى ازاماتتىق سوت ءىسىن جۇرگىزۋ تارتىبىمەن ءوندىرىپ الۋ قۇقىعى تۇسىندىرىلگەن.
سوت وكىلدەرىنىڭ ايتۋىنشا، شەشىم زەرتتەلگەن دالەلدەر نەگىزىندە جانە زاڭ تالاپتارىنا سايكەس قابىلدانعان.
ەسكە سالايىق، 30 قازاندا ساعات 17:00 شاماسىندا سەمەي قالاسىنداعى وبلىستىق سوت عيماراتىنىڭ ماڭىندا ەر ادام ءوزىن ورتەپ، كوز جۇمعان. پوليتسيا مالىمەتىنشە، اتالعان دەرەك بويىنشا قىلمىستىق ءىس قوزعالعان. قازىر وقيعانىڭ بارلىق ءمان-جايى انىقتالىپ جاتىر.
