Astana qalasynyŋ mamandandyrylǧan audanaralyq qylmystyq soty «Qazspeseksport» respublikalyq memlekettık käsıpornynyŋ būrynǧy basşylaryna qatysty ükım şyǧardy. Olar äskeri maqsattaǧy önımderdı satyp alu barysynda biudjet qarajatyn jymqyrdy degen aiyppen sottaldy, dep habarlaidy “Adyrna”.
Qarjy monitoringı agenttıgınıŋ habarlauynşa, käsıporynnyŋ būrynǧy bas direktory Arman Ramazanov 11 jylǧa bas bostandyǧynan aiyryldy. Al import departamentınıŋ direktory Azat Qūdabaev 10 jylǧa sottaldy. Sonymen qatar, osy qylmystyq ıske qatysy bar taǧy toǧyz adam türlı merzımge bas bostandyǧynan aiyryldy.
Sot memleket müddesınde 1,6 milliard teŋge (şamamen 3 mln AQŞ dollary) kölemındegı materialdyq şyǧyndy öteu turaly talapty qanaǧattandyrdy. Sonymen bırge, aiyptaluşylardan 607 million teŋge (şamamen 1,1 mln AQŞ dollary) tūratyn mülıktı tärkıleu turaly şeşım şyǧardy.
Atalǧan ükım älı zaŋdy küşıne engen joq.
Aita keteiık, 2023 jyly küştık qūrylymdar «Qazspeseksport» qyzmetkerlerı men olardyŋ serıktes jetkızuşılerın ūstaǧan bolatyn. Tergeu mälımetterı boiynşa, käsıporyn basşylyǧy men affilirlengen tūlǧalar şet memleketterden äskeri tehnika satyp alu kezınde tauarlardyŋ baǧasyn qoldan köterıp, memlekettık qarajatty maqsatsyz jūmsaǧan. Tergeu materialdarynda keltırılgen şyǧyn kölemı 1,6 milliard teŋgeden asqan.
Sonymen qatar, käsıporyn basşysy qyzmetın uaqytşa atqarǧan Arşat Aiaǧanov ta sottalǧany belgılı. Ol qyzmet babyn asyra paidalandy degen aiyppen 4 jyl 8 aiǧa bas bostandyǧynan aiyryldy. Būl ükım 2025 jyldyŋ qaŋtarynda şyqqan bolatyn.
