28 تامىز كۇنى دۋشانبە قالاسىندا تاجىكستان پرەزيدەنتى ەمومالي راحمون ورتالىق ازيانى XXI عاسىردا دامىتۋ ماقساتىندا دوستىق، تاتۋ كورشىلىك جانە ىنتىماقتاستىق تۋرالى شارتقا قول قويدى. بۇل تۋرالى تاجىكستان پرەزيدەنتىنىڭ ءباسپاسوز قىزمەتى جاريالادى، دەپ حابارلايدى “ادىرنا”.
ءراسىم قازاقستاننىڭ پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋمەن كەزدەسۋدەن كەيىن ءوتتى. تاراپتار بۇل قۇجاتتىڭ جۇزەگە اسىرىلۋى وڭىردەگى بەيبىتشىلىك، تۇراقتىلىق جانە ورنىقتى دامۋدى نىعايتۋدىڭ ماڭىزدى فاكتورى بولاتىنىن اتاپ ءوتتى.
كەلىسسوزدەر بارىسىندا ساياسي ىنتىماقتاستىق، ساۋدا-ەكونوميكالىق بايلانىستاردى دامىتۋ جانە مادەني-گۋمانيتارلىق سالاداعى ارىپتەستىك ماسەلەلەرى تالقىلاندى. سونداي-اق، الداعى جوعارى دەڭگەيدەگى كەزدەسۋلەر كەستەسى، تمد ءسامميتى مەن «ورتالىق ازيا – رەسەي» فورماتىنداعى جيىنعا دايىندىق ءسوز بولدى. اتالعان ءىس-شارالار دۋشانبە قالاسىندا وتەدى.
بۇل شارت العاش رەت 2022 جىلعى 21 شىلدەدە چولپون-اتادا قازاقستان، وزبەكستان جانە قىرعىزستان پرەزيدەنتتەرى تاراپىنان قول قويىلىپ قابىلدانعان. ول كەزدە تاجىكستان مەن تۇركىمەنستان ىشكى مەملەكەتتىك راسىمدەردى اياقتاۋ قاجەتتىگىن العا تارتىپ، كەلىسىمگە قوسىلماعان بولاتىن. ەندى دۋشانبە بۇل كەلىسىمگە رەسمي تۇردە قوسىلدى.
نەگىزگى تارماقتار:
- قاتىسۋشى ەلدەر وڭىردەگى قاۋىپسىزدىك پەن تۇراقتىلىقتى نىعايتۋعا مىندەتتەلەدى.
- ەگەمەندىككە نەمەسە اۋماقتىق تۇتاستىققا قاۋىپ تونگەن جاعدايدا تاراپتار ءبىر-بىرىنە كومەك كورسەتەدى.
- بارلىق داۋلى ماسەلەلەر تەك ديپلوماتيالىق جولمەن شەشىلۋى ءتيىس.
- ەلدەر ءبىر-بىرىنە قارسى اسكەري بلوكتار مەن وداقتارعا كىرمەيدى.
- ءۇشىنشى ەلدەردىڭ اۋماق پەن ينفراقۇرىلىمدى كورشى مەملەكەتتەرگە زيان كەلتىرۋ ءۇشىن پايدالانۋىنا جول بەرىلمەيدى.
