سىرتقى ىستەر ءمينيسترى قىزمەتىنە ەرمەك كوشەرباەۆ تاعايىندالدى. بۇل تۋرالى اقوردا جازدى، دەپ حابارلايدى «ادىرنا».
«مەملەكەت باسشىسىنىڭ جارلىعىمەن ەرمەك بەدەلبايۇلى كوشەرباەۆ قازاقستان رەسپۋبليكاسىنىڭ سىرتقى ىستەر ءمينيسترى بولىپ تاعايىندالدى، ول بۇرىنعى اتقارعان لاۋازىمىنان بوساتىلدى»، دەلىنگەن حابارلامادا.
ەرمەك كوشەرباەۆ 2025 جىلدىڭ اقپان ايىنان باستاپ پرەمەر-ءمينيستردىڭ ورىنباسارى قىزمەتىن اتقاردى. وعان دەيىن ول شىعىس قازاقستان وبلىسىنىڭ اكىمى، قازاقستان رەسپۋبليكاسىنىڭ رەسەي فەدەراتسياسىنداعى توتەنشە جانە وكىلەتتى ەلشىسى، سىرتقى ىستەر ءمينيسترىنىڭ ورىنباسارى لاۋازىمدارىن اتقارعان.
بۇعان دەيىن سىرتقى ىستەر ءمينيسترى قىزمەتىندە مۇرات نۇرتىلەۋ وتىرعان. بۇگىن ول لاۋازىمنان بوساتىلدى.
ەسكە سالساق، 4 قىركۇيەكتە قازنەتتە قازاقستاننىڭ سىرتقى ىستەر ءمينيسترى مۇرات نۇرتالەۋ، كاسىپكەر گادجي گادجيەۆ جانە ۇقك-نىڭ جوعارى لاۋازىمدى قىزمەتكەرلەرى ۇستالعانىن جازعان بولاتىن. بىراق ودان كەيىن سىرتقى ىستەر مينيسترلىگىنىڭ رەسمي وكىلى ايبەك سمادياروۆ مۇرات نۇرتىلەۋدىڭ ۇستالعانى شىندىققا ساي كەلمەيتىنىن مالىمدەگەن.
ارادا ءبىر كۇن وتكەندە مۇرات نۇرتىلەۋ ەل الدىنا شىقتى. ول "Harvest Group" توراعاسى الماز السەنوۆپەن اگرو-يندۋستريالىق كلاستەردى قۇرۋ بارىسىن تالقىلاعان.
