الماتى قالاسىنىڭ المالى اۋداندىق سوتى قازاقستاندا اتوم ەلەكتر ستانتسياسىن (اەس) سالۋعا قارسى شىققان بەس بەلسەندىگە ارقايسىسىنا 4 جىلعا ەركىندىگىن شەكتەۋ جازاسىن تاعايىندادى. پروكۋرور ايىپتالۋشىلارعا 5 جىلعا تۇرمە جازاسىن سۇراعان بولاتىن، دەپ حابارلايدى “ادىرنا” ۇلتتىق پورتالى Orda.kz سايتىنا سىلتەپ.
باسپاسوزدە نۇرلان جاۋلىباەۆ، جانات قازاقباي، فازىلجان سىزدىقوۆ، نۇرلان تەمىرعاليەۆ پەن ايدار مۇباراكوۆ ۇلكەن بۇزاقىلىق ۇيىمداستىرۋعا ارەكەت جاسادى دەگەن ايىپ تاعىلعانى ەسكە سالىندى.
تەرگەۋ نۇسقاسى بويىنشا، بەلسەندىلەر بيلىككە قارسىلىق كورسەتىپ، كۇش قولدانۋ، ءورت قويۋ، مۇلىك جويۋ، قارۋ-جاراق پەن جارىلعىش زاتتاردى پايدالانۋ ارقىلى تارتىپسىزدىك ۇيىمداستىرۋدى كوزدەگەن.
ايىپتالۋشىلار – زەينەت جاسىنا جاقىنداعان جانە زەينەتكەرلىك جاسىنداعى ەر ادامدار پروكۋروردىڭ ايىپتاۋىمەن كەلىسپەدى. ولار تەك اەس قۇرىلىسىنا قارسى شىققانىن راستادى، بىراق بۇزاقىلىق ۇيىمداستىرۋدى جوققا شىعاردى. كەيبىر بەلسەندىلەردى ازاماتتىق ۇستانىمدارى ءۇشىن قۋدالاپ جاتقانىنا كۇمانداندى. ادۆوكاتتار كۇشتىك قۇرىلىمداردىڭ ايىپتاۋعا ناقتى دالەلدەرى جوق ەكەنىن قورعاۋ نەگىزى ەتتى.
سوت تورەشىسى ەرنار قاسىمبەكوۆ ءار ءبىر ايىپتالۋشىنى 4 جىلعا ەركىندىگىن شەكتەۋ جازاسىنا كەستى. ۇكىم وقىلعان سوڭ سوت زالىنداعىلار قوشەمەت كورسەتتى، دەپ تولىقتىردى باق.
2024 جىلعى 6 قازاندا اەس قۇرىلىسىنا قاتىستى رەفەرەندۋم الدىندا الماتى، اقتوبە، پاۆلودار، پەتروپاۆل، ورال جانە شىمكەنت قالالارى اكىمدىكتەرى اتوم ەلەكتر ستانتسياسىنا قارسى ميتينگ وتكىزۋگە رۇقسات بەرمەدى. دەگەنمەن ازاماتتار اكتسيالار وتكىزىپ، ولاردا جاپپاي ۇستاۋ جاعدايلارى ورىن الدى. مىسالى، الماتىدا 10-نان استام ادام پوليتسياعا جەتكىزىلدى، ولاردىڭ بەسەۋى قىلمىستىق ءىس ماتەريالدارىنا ىلىككەن.
2023 جىلعى 7 قازاندا قازاقستان ورتالىق سايلاۋ كوميسسياسى ەلدەگى داۋىس بەرگەندەردىڭ 71%-نان استامى اەس قۇرىلىسى يدەياسىن قولداعانىن حابارلادى.
