قازاقستاندا ەنەرگيا كوزدەرىنىڭ تۇراقتىلىعىن قامتاماسىز ەتۋ ءۇشىن الداعى جىلدارى كەمىندە 3–4 اتوم ەلەكتر ستانتسياسىن سالۋ جوسپارلانىپ وتىر، دەپ حابارلايدى "ادىرنا" ۇلتتىق پورتالى.
بۇل تۋرالى اتوم ەنەرگياسى جونىندەگى اگەنتتىك توراعاسى الماسادام ساتقاليەۆ مالىمدەدى.
ونىڭ ايتۋىنشا، قازىرگى تاڭدا ەكىنشى جانە ءۇشىنشى اەس سالىناتىن وڭىرلەر ناقتىلانۋ ۇستىندە. ماماندار قۇرىلىسقا ەڭ قولايلى الاڭداردى ەنەرگەتيكالىق تەڭگەرىم، ەكولوگيالىق جانە سەيسميكالىق قاۋىپسىزدىك تالاپتارى تۇرعىسىنان جان-جاقتى زەرتتەپ جاتىر.
«قازىر قۇرىلىستى سالۋعا ەڭ قولايلى الاڭداردى جان-جاقتى زەرتتەپ جاتىرمىز. بولجامدى ەنەرگيا تەڭگەرىمى تۇرعىسىنان دا، ەكولوگيالىق جانە سەيسميكالىق قاۋىپسىزدىك تالاپتارى تۇرعىسىنان دا قازاقستاندا اتوم ەنەرگەتيكاسىن دامىتۋعا ارنالعان بىرنەشە ورىن بار ەكەنىن كورىپ وتىرمىز»، – دەدى ساتقاليەۆ.
الدىن الا قاراستىرىلىپ جاتقان نەگىزگى ايماقتاردىڭ ءبىرى – بالقاش ماڭى. مۇندا التى ءىرى ەنەرگەتيكالىق بلوك سالۋعا مۇمكىندىك بار. سونىمەن قاتار كۋرچاتوۆ قالاسى كىشى جانە ورتا قۋاتتى رەاكتورلاردى دامىتۋعا قولايلى الاڭ رەتىندە باعالانۋدا.
بۇدان بولەك، باتىس قازاقستان وبلىسى دا قاراستىرىلىپ جاتىر. بۇل وڭىردە ەنەرگەتيكالىق نىسانداردى پايدالانۋ تاجىريبەسى بار. مۇنداعى قوندىرعىلار تەك ەلەكتر ەنەرگياسىن وندىرۋمەن شەكتەلمەي، تۇرعىن ۇيلەردى جىلۋ جانە ىستىق سۋمەن قامتاماسىز ەتۋگە، ءتىپتى تەڭىز سۋىن تۇششىتۋعا مۇمكىندىك بەرەدى.
ساتقاليەۆتىڭ ايتۋىنشا، ۇزاق مەرزىمدى پەرسپەكتيۆادا قوستاناي وبلىسى دا اتوم ەلەكتر ستانتسيالارىن سالۋعا الەۋەتتى وڭىرگە اينالۋى مۇمكىن.
