تاشكەنتتە شانحاي ىنتىماقتاستىق ۇيىمىنا قاتىسۋشى ەلدەردىڭ ايەلدەر فورۋمى ءوتتى

756

19 تامىزدا تاشكەنت قالاسىندا (وزبەكستان) شانحاي ىنتىماقتاستىق ۇيىمىنا قاتىسۋشى ەلدەردىڭ ايەلدەر فورۋمى ءوتتى، دەپ حابارلايدى “ادىرنا” ۇلتتىق پورتالى.

فورۋمنىڭ نەگىزگى ماقساتى – گەندەرلىك تەڭدىكتى قامتاماسىز ەتۋ، ايەلدەردىڭ قۇقىقتارى مەن مۇمكىندىكتەرىن كەڭەيتۋ، سونداي-اق ورنىقتى دامۋ باسىمدىقتارىنا قول جەتكىزۋگە بايلانىستى فورۋمعا مۇشە ەلدەردىڭ ءوزارا ءىس-قيمىلىن نىعايتۋ بويىنشا شىۇ مەملەكەتتەرىنىڭ ءوزارا ءىس-قيمىلىن ودان ءارى دامىتۋ.

فورۋمدى ەل ۇكىمەتى، شىۇ حالىق ديپلوماتياسى ورتالىعى جانە وزبەكستان رەسپۋبليكاسىنىڭ وتباسى جانە ايەلدەر ىستەرى جونىندەگى مەملەكەتتىك كوميتەتى ۇيىمداستىردى.

قازاقستاندىق دەلەگاتسيا قۇرامىنا قر پارلامەنتى، قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا وكىلدەرى كىردى.

فورۋمنىڭ اشىلۋىندا قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتورايىمى، قر پرەزيدەنتى اكىمشىلىگى باسشىسىنىڭ ورىنباسارى ايدا بالاەۆا قۇتتىقتاۋ ءسوز سويلەدى.

ءوز سوزىندە ا.بالاەۆا بۇگىندە شىۇ كەڭىستىگىندەگى ەلدەردىڭ تابىستى دامۋى ايەلدەردىڭكوپ جاعدايدا مەملەكەتتەردىڭ الەۋمەتتىك-ەكونوميكالىق جانە قوعامدىق-ساياسي ءومىرىنىڭ ءتۇرلى سالالارىنا قوسقان جاسامپاز ۇلەسىنە بايلانىستى ەكەنىن اتاپ ءوتتى.

«بۇل شىۇ-عا مۇشە ەلدەردىڭ بۇۇ-نىڭ ورنىقتى دامۋ، پارمەندى گەندەرلىك تەڭدىكتى قامتاماسىز ەتۋ سالاسىنداعى ماقساتتارىنا بەيىلدىلىگىن جانە ولاردىڭ ەكونوميكا مەن بيلىكتەگى، شەشىمدەر قابىلداۋ ۇدەرىستەرىندەگى ايەلدەردىڭ ءرولىن ارتتىرۋعا ۇمتىلىسىن ايقىن كورسەتەدى», - دەپ اتاپ ءوتتى ۇلتتىق كوميسسيا باسشىسى.

قازاقستاندىق دەلەگاتسيانىڭ باسشىسى اسەان، ەىدۇ سياقتى سەرىكتەس ۇيىمداردىڭ الاڭدارىندا ايەلدەردىڭ قۇقىقتارى مەن مۇمكىندىكتەرىن ىلگەرىلەتۋ ماسەلەلەرى بويىنشا شىۇ ەلدەرىنىڭ ۇكىمەتتىك، ىسكەرلىك جانە عىلىمي توپتارىنىڭ بىرلەسكەن ءىس-قيمىلدارىن دامىتۋدى ۇسىندى.

سونداي-اق، شىۇ حاتشىلىعىنىڭ نازارى شىۇ-نىڭ وسى باعىتتاعى ىنتىماقتاستىق جونىندەگى قوسالقى قۇرىلىمىنىڭ ىرگەتاسىن قالاۋ ماقساتىندا بۇۇ-نىڭ ايەلدەر جاعدايى جونىندەگى كوميسسياسى جۇمىسىنىڭ ادىستەرىن زەرتتەۋدىڭ ماڭىزدىلىعىنا اۋدارىلدى.

ءسوز سوڭىندا ا.بالاەۆا فورۋم قورىتىندىسى شىۇ ەلدەرىنە ايەلدەر مەن قىزدارعا قاتىستى زورلىق-زومبىلىققا قارسى كۇرەس، ايەلدەر باستامالارىن ىلگەرىلەتۋ جانە ۇيىمنىڭ قىزمەتىنە ايەلدەردىڭ قاتىسۋىن كەڭەيتۋ بويىنشا تابىستى تاجىريبەمەن جانە ۇزدىك تاجىريبەلەرمەن الماسۋعا مۇمكىندىك بەرەتىنىنە سەنىم ءبىلدىردى.

قازاقستاندىق دەلەگاتسيا مۇشەلەرى فورۋمنىڭ پلەنارلىق جانە سەكتسيالىق الاڭدارىنا بەلسەندى قاتىستى.

قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ورىنباسارى، پارلامەنت سەناتىنىڭ دەپۋتاتى ءلاززات سۇلەيمەن «ءايەلدەردىڭ قوعامدىق-ساياسي ومىردە ماڭىزدى ءرول اتقاراتىن شەشىمدەر قابىلداۋعا قاتىسۋى» تاقىرىبىندا بايانداما جاساپ، «پاندەميا سىن-تەگەۋرىندەرىن ەڭسەرۋدەگى گەندەرلىك ۇلەس» سەسسياسىن مودەراتسيالادى.

سونىمەن قاتار، فورۋمعا قازاقستاندىق QazVac ۆاكتسيناسىن ازىرلەۋشى، «بيولوگيالىق قاۋىپسىزدىك پروبلەمالارىنىڭ عىلىمي-زەرتتەۋ ينستيتۋتى» رمك باس ديرەكتورى كۇنسۇلۋ زاكاريا قاتىستى.

ول حالىقارالىق الاڭعا قاتىسۋشىلارعا قازاقستاننىڭ QazVac ۆاكتسيناسىن ازىرلەۋ تاجىريبەسى جانە وسى سالاداعى عىلىمي قىزمەتتىڭ باسىم باعىتتارى تۋرالى ايتىپ بەردى.

فورۋمعا شىۇ-عا مۇشە ەلدەردىڭ گەندەرلىك ماسەلەلەر جونىندەگى مەملەكەتتىك ورگاندارىنىڭ باسشىلارى (رەسمي دەلەگاتسيالاردىڭ باسشىلارى), دەپۋتاتتار، ساياسي جانە قوعام قايراتكەرلەرى، حالىقارالىق ازاماتتىق قوعام ينستيتۋتتارىنىڭ وكىلدەرى، ساراپشىلار، عالىمدار، باق وكىلدەرى قاتىستى.

فورۋم قورىتىندىسى بويىنشا تاشكەنت كومميۋنيكەسى قابىلداندى.

ادىرنا” ۇلتتىق پورتالى

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket