"ەكى رەت ءوتىنىش جازدىم". الماتىدا اۋدان اكىمى ءوز ەركىمەن قىزمەتتەن كەتتى

الماتى قالاسى بوستاندىق اۋدانىنىڭ اكىمى سانجار ءالين قىزمەتىنەن كەتتى، دەپ حابارلايدى "ادىرنا" ۇلتتىق پورتالى.

ء«يا، ەكى رەت ءوتىنىش بەردىم. العاشقىسىن 1 شىلدەدە جازدىم، بىراق قالۋىمدى سۇرادى. ەكىنشىسىن 4 تامىزدا تاپسىردىم، قازىر كەلىسىمىن كۇتىپ وتىرمىن»، – دەدى ول.

ءاليننىڭ ايتۋىنشا، وتستاۆكاسى باسقا قىزمەتكە اۋىسۋىنا بايلانىستى.

سانجار ءالين 2023 جىلعى 19 مامىردان بەرى بوستاندىق اۋدانىنىڭ اكىمى قىزمەتىن اتقاردى. ول 1984 جىلعى 30 تامىزدا تۋعان. Regents Business College-ءدى «حالىقارالىق ماركەتينگ» ماماندىعى بويىنشا ءبىتىرىپ، The University of Winchester ۋنيۆەرسيتەتىندە MBA دارەجەسىن العان. سونداي-اق د.ا. قوناەۆ اتىنداعى گۋمانيتارلىق كولىك جانە قۇقىق ۋنيۆەرسيتەتىنىڭ ديپلومى بار.

ءار جىلدارى جەكە بيزنەس، كۆازيمەملەكەتتىك سەكتور جانە مەملەكەتتىك قىزمەتتە ەڭبەك ەتكەن. الماتىداعى ەنەرگەتيكا جانە ينفراقۇرىلىم سالاسىنداعى بولىمدەردى باسقارعان.

ايتا كەتەيىك، الماتى قالاسىنىڭ جاڭا اكىمى دارحان ساتىبالدى قىزمەتىنە كىرىسكەننەن كەيىن قالا اكىمدىگىندە بىرقاتار كادرلىق وزگەرىستەر بولدى. سوڭعى كۇندەرى قالانىڭ بىرنەشە باسشى قىزمەتكەرلەرى بوساتىلدى. 7 تامىزدا قالا اكىمىنىڭ ورىنباسارى اسەم ءنۇسىپوۆا، ال 13 تامىزدا اسقار ءامرين قىزمەتىنەن كەتكەن.