پرەزيدەنتتىڭ تاپسىرماسىمەن الماتىدا ارنايى سەيسمولوگيالىق زەرتتەۋلەر جۇرگىزىلمەك، دەپ حابارلايدى "ادىرنا" ءتىلشىسى.
12 ساۋىردە عىلىم جانە تەحنولوگيالار جونىندەگى ۇلتتىق كەڭەس وتىرىسىندا مەملەكەت باسشىسى قاسىم-جومارت توقاەۆ ماڭىزدى تاپسىرمالارىن جاريالادى.
«سونداي-اق ءبىزدىڭ الدىمىزدا ەنەرگەتيكالىق ىركىلىستەردى، ەپيدەميالاردى جانە قۇرعاقشىلىقتى بولجاۋ جانە الدىن الۋ مىندەتى تۇر. ءتيىستى مينيسترلىكتەر مەن اكىمدىكتەر توتەنشە جاعدايلاردىڭ ىقتيمال قاۋىپتەرىن ەسكەرە وتىرىپ، گيدرولوگيا، كليماتولوگيا، گەوگرافيا، ينجەنەريا جانە ت.ب. سالالاردى دامىتۋ باعدارلامالارىن قاراستىرۋى كەرەك»،- دەدى قاسىم-جومارت توقاەۆ.
ودان بولەك، پرەزيدەنت توقاەۆ الماتى اۋماعىندا سەيسمولوگيالىق زەرتتەۋلەردىڭ جۇرگىزىلەتىنىن ايتتى.
"مەنىڭ تاپسىرماممەن الماتى اۋماعىنا ارنايى سەيسمولوگيالىق زەرتتەۋ جۇرگىزىلەدى. اكىمدىك ءۇش جىلدىق زەرتتەۋ جۇمىستارىنا قارجى بولەدى. ەنەرگەتيكالىق اپاتتى، ەپيدەميانى، قۋاڭشىلىقتى بولجاۋ جانە ونىڭ الدىن الۋ ماسەلەسى اسا ماڭىزدى. جاۋاپتى مينيسترلىكتەر ءتيىستى سالانى، ال اكىمدىكتەر ايماقتاردى دامىتۋ باعدارلامالارىن قايتا قاراۋى كەرەك. اسىرەسە، توتەنشە جاعداي تۋىنداۋ قاۋپى بار-جوعىن مۇقيات زەرتتەۋ قاجەت. بۇل جۇمىسقا عىلىمي قاۋىمداستىقتى جۇمىلدىرعان ءجون. ياعني گيدرولوگيا، كليماتولوگيا، گەوگرافيا، ينجەنەريا جانە وزگە دە سالا ماماندارىن تارتۋ قاجەت", - دەدى پرەزيدەنت.
