الماتىداعى ءادي ءشارىپوۆ كوشەسىندە اعاشتاردى كەسۋ جۇمىستارى باستالدى. بۇل جۇمىستار 27 جاستاعى ايەلدىڭ ۇستىنە اعاش بۇتاعى قۇلاپ، قازا تاپقان قايعىلى وقيعادان كەيىن جۇرگىزىلىپ جاتىر، دەپ حابارلايدى "ادىرنا" ۇلتتىق پورتالى.
اعاشتاردى كەسۋ 14 شىلدەدە، قايعىلى جاعدايدان ءبىر كۇن وتكەن سوڭ باستالعان. مارقۇم تاتيانا تۇسكى ۋاقىتتا كوفە الۋعا شىققاندا، ۇستىنە اعاشتىڭ ۇلكەن بۇتاعى قۇلاپ كەتكەن. ايەل وقيعا ورنىندا كوز جۇمدى. ارتىندا كۇيەۋى مەن كىشكەنتاي بالاسى قالدى.
قۇرعاق بۇتاقتاردى كەسۋ جۇمىستارى ءشارىپوۆ پەن قاراساي باتىر كوشەلەرىنىڭ قيىلىسىندا جانە ءشارىپوۆ كوشەسىندە جۇرگىزىلۋدە.
المالى اۋداندىق اكىمدىك وكىلى كەسۋ جۇمىستارى تەك قايعىلى وقيعامەن بايلانىستى ەمەس ەكەنىن ايتتى. ونىڭ سوزىنشە، تۇرعىنداردان وسى كوشەدەگى اعاشتارعا قاتىستى بىرنەشە ءوتىنىش تۇسكەن، قازىر سوعان سايكەس جۇمىس اتقارىلىپ جاتىر.
ايتا كەتەيىك، الماتى قالاسى اكىمدىگىنىڭ مالىمەتىنشە، قايعىلى جاعدايعا سەبەپ بولعان اعاش ۆيزۋالدى تەكسەرۋ كەزىندە «جاسىل، قاناعاتتانارلىق كۇيدە» دەپ باعالانعان. الايدا وقيعادان كەيىن قالا تۇرعىندارى جاسىل جەلەككە جاۋاپتى ورگانداردىڭ جۇمىسىنا سىن ايتتى.
