الماتى قالاسىنداعى «بايسات» كوتەرمە-بولشەك ساۋدا بازارى بىرنەشە رەت وتكىزىلمەگەن اۋكتسيوننان كەيىن 24,8 ميلليارد تەڭگەگە ساتىلدى، دەپ حابارلايدى "ادىرنا" ءتىلشىسى Tengrinews.kz-كە سىلتەپ.
باق دەرەكتەرىندە نۇرسۇلتان نازارباەۆتىڭ نەمەرە ءىنىسى، تۇڭعىش پرەزيدەنتتىڭ اعاسى ساتىبالدى نازارباەۆتىڭ ۇلى, كاسىپكەر قايرات ساتىبالدىعا تيەسىلى بولعانى تۋرالى اقپارات تاراعان.
مەملەكەتتىك مۇلىك تىزىلىمىندەگى مالىمەتكە سايكەس، اۋكتسيونعا ءبىر عانا قاتىسۋشى ءوتىنىم بەرگەن. ساۋدا-ساتتىق باعانى كوتەرۋ ادىسىمەن وتكەن. الايدا بازاردىڭ جاڭا يەسى تۋرالى اقپارات جاريالانعان جوق.
«بايسات» بازارى بۇعان دەيىن بەس رەتتەن استام ساۋداعا شىعارىلعان. العاش رەت 2025 جىلدىڭ قىركۇيەگىندە ونىڭ باستاپقى باعاسى 28,6 ميلليارد تەڭگە بولىپ بەلگىلەنگەنىمەن، ساتىپ الۋشى تابىلماعان. كەيىن باعا 26 ميلليارد تەڭگەگە، ودان سوڭ 24,7 ميلليارد تەڭگەگە دەيىن تومەندەتىلگەن. سوڭعى اۋكتسيوندا اكتيۆ 24,8 ميلليارد تەڭگەگە ساتىلدى.
بازار الماتى قالاسىنىڭ جەتىسۋ اۋدانىنداعى سولتۇستىك اينالما جولى، 7 مەكەنجايىندا ورنالاسقان. اكتيۆ قۇرامىنا جالپى اۋدانى شامامەن 13 گەكتار بولاتىن ەكى جەر ۋچاسكەسى، ساۋدا پاۆيلوندارى، قويمالار، اكىمشىلىك عيمارات، اسحانا، باقىلاۋ-وتكىزۋ پۋنكتى جانە باسقا دا شارۋاشىلىق نىساندارى كىرەدى. نىسان ازىق-تۇلىك، كيىم-كەشەك، قۇرىلىس ماتەريالدارى، سانتەحنيكا جانە وزگە دە تاۋارلار ساتىلاتىن ءىرى كوتەرمە-بولشەك ساۋدا ورتالىعى سانالادى. مامانداردىڭ باعالاۋىنشا، «بايسات» ورتا بيزنەس سۋبەكتىسىنە جاتادى. 2025 جىلدىڭ العاشقى جارتىجىلدىعىندا بازار ساۋدا ورىندارىن جالعا بەرۋ ەسەبىنەن 1 ميلليارد تەڭگەدەن استام تابىس تاپقان.
