Almatydaǧy Ädi Şärıpov köşesınde aǧaştardy kesu jūmystary bastaldy. Būl jūmystar 27 jastaǧy äieldıŋ üstıne aǧaş būtaǧy qūlap, qaza tapqan qaiǧyly oqiǧadan keiın jürgızılıp jatyr, dep habarlaidy "Adyrna" ūlttyq portaly.
Aǧaştardy kesu 14 şıldede, qaiǧyly jaǧdaidan bır kün ötken soŋ bastalǧan. Marqūm Tatiana tüskı uaqytta kofe aluǧa şyqqanda, üstıne aǧaştyŋ ülken būtaǧy qūlap ketken. Äiel oqiǧa ornynda köz jūmdy. Artynda küieuı men kışkentai balasy qaldy.
Qūrǧaq būtaqtardy kesu jūmystary Şärıpov pen Qarasai batyr köşelerınıŋ qiylysynda jäne Şärıpov köşesınde jürgızılude.
Almaly audandyq äkımdık ökılı kesu jūmystary tek qaiǧyly oqiǧamen bailanysty emes ekenın aitty. Onyŋ sözınşe, tūrǧyndardan osy köşedegı aǧaştarǧa qatysty bırneşe ötınış tüsken, qazır soǧan säikes jūmys atqarylyp jatyr.
Aita keteiık, Almaty qalasy äkımdıgınıŋ mälımetınşe, qaiǧyly jaǧdaiǧa sebep bolǧan aǧaş vizualdy tekseru kezınde «jasyl, qanaǧattanarlyq küide» dep baǧalanǧan. Alaida oqiǧadan keiın qala tūrǧyndary jasyl jelekke jauapty organdardyŋ jūmysyna syn aitty.
