اباي وبلىسىنداعى ابايدىڭ 180 جىلدىعىنا ارنالعان ونكۇندىك مەرەيتويلىق شارالار لەگى اقىننىڭ تۋعان جەرى – اباي اۋدانىندا تۇيىندەلدى.
قاراۋىلتوبەدە ۇلتتىق سپورتتىڭ بىرنەشە تۇرىنەن سايىستار ۇيىمداستىرىلدى. «جەتى قازىنا» فەستيۆالى اياسىندا جورعا جارىسى، سونداي-اق توپ بايگە (16 شاقىرىم) مەن الامان بايگە (25) ءوتتى. قازاق كۇرەسىنەن «تۇيە پالۋان» (90 كەلىدەن جوعارى) مەن «وگىز پالۋان» (74 كەلىگە دەيىن) انىقتالدى.
جۇلدەلى ورىندارعا يە بولعان سپورتشىلارعا وبلىستىڭ دەمەۋشىلەرى اتىنان جالپى سانى 90 باس جىلقى مەن 10 اۆتوكولىك سىيلىق رەتىندە بەرىلدى.
ەرەكشە اتاپ وتەرلىگى، ۇلى ابايدىڭ جاقسى كورگەن ويىنى توعىزقۇمالاق سايىسى مەن 180 شاقىرىمدىق ۋلترامارافونعا ەلىمىز بويىنشا تۇڭعىش رەت اۆتوكولىك سىيعا تارتىلدى. سەمەي مەن قاراۋىل اراسىن 19 ساعات، 9 مينۋتتا جۇگىرىپ وتكەن باۋبەك يلياسوۆ (باتىس قازاقستان وبلىسى) جارىس جەڭىمپازى اتاندى. توعىزقۇمالاق سايىسىندا شىمكەنتتىك عالىمجان تەمىرباەۆ ءبىرىنشى ورىندى يەلەندى. «تۇيە بالۋان» سايىسىندا ماڭعىستاۋلىق نۇرداۋلەت جارىلعاپوۆ، «وگىز پالۋان» سايىسىندا الماتىلىق جىگەر ەركىنۇلى قارسىلاس شاق كەلتىرمەدى. «توپ بايگەدە» الماتى وبلىسىنىڭ، «الامان بايگەدە» پاۆلودار قالاسىنىڭ، جورعا جارىسىندا قىرعىزستاننىڭ جۇيرىگى توپ جاردى. جۇلدەگەرلەردىڭ بارلىعى كولىكتى بولدى. «جەتى قازىنا» فەستيۆالىنىڭ جەڭىمپازدارى جۇلدەگە جىلقى الدى.
وبلىس اكىمى بەرىك ءۋالي جورعا، توپ بايگە، الامان بايگە، توعىزقۇمالاق، ۋلترامارافون، قازاقشا كۇرەس جارىستارىنىڭ جەڭىمپازدارىن
ماراپاتتاۋ سالتاناتىنا قاتىستى.
ايماق باسشىسى مەرەيتويلىق ونكۇندىك اياسىندا توي تويلاۋعا ەمەس، وي ويلاۋعا، رۋحاني، زياتكەرلىك، تانىمدىق، سپورتتىق شارالارعا باسا ءمان بەرىلگەنىن ايتتى.
«جالپى، 10 كۇندىك ءىس-شارا ەلدىڭ بەرەكە-بىرلىگىنىڭ ارقاسىندا جوعارى دەڭگەيدە ءوتتى دەپ ەسەپتەيمىن. «اباي اكادەمياسى» اتتى ەنتسيكلوپەديالىق پورتال اشىلدى. بىرنەشە كىتاپتىڭ تۇساۋى كەسىلدى. مىڭنان استام كوماندا قاتىسقان «اباي كۋيز» ينتەللەكتۋالدىق ويىنى وتكىزىلدى. زاعيپ جاندار مەن ناشار كورەتىن ازاماتتارعا ارنالعان كىتاپحانا ىسكە قوسىلدى. وزدەرىڭىز كورگەندەي، جۇلدە قورلارىنىڭ ءار ايماققا، ءتىپتى قىرعىز ەلىنە دەيىن كەتكەنى قۋانتادى. وسى رەتتە تويدىڭ جوعارى دەڭگەيدە وتۋىنە اتسالىسقان وبلىستىڭ جاناشىر ازاماتتارىنا العىس ايتامىن» دەدى ايماق باسشىسى.
سونىمەن قاتار، اباي اۋدانىنىڭ قاراۋىل اۋىلى ماڭىنداعى قاراۋىلتوبەدە «اباي ەلى» ستەللاسى پايدالانۋعا بەرىلدى. بۇل نىسان اۋدان قوناقتارى ءۇشىن اۋىلدىڭ كوركەم كەلبەتىن بيىكتەن تاماشالاۋعا مۇمكىندىك بەرەتىن ەرەكشە كورىكتى ورىنعا اينالماق.
ون كۇنگە سوزىلعان حاكىم تويى قاراۋىلتوبەدە «جەلسىز تۇندە جارىق اي» گالا-كونتسەرتىمەن تۇيىندەلدى.
