Abai oblysyndaǧy Abaidyŋ 180 jyldyǧyna arnalǧan onkündık mereitoilyq şaralar legı aqynnyŋ tuǧan jerı – Abai audanynda tüiındeldı.
Qarauyltöbede ūlttyq sporttyŋ bırneşe türınen saiystar ūiymdastyryldy. «Jetı qazyna» festivalı aiasynda jorǧa jarysy, sondai-aq top bäige (16 şaqyrym) men alaman bäige (25) öttı. Qazaq küresınen «Tüie paluan» (90 kelıden joǧary) men «Ögız paluan» (74 kelıge deiın) anyqtaldy.
Jüldelı oryndarǧa ie bolǧan sportşylarǧa oblystyŋ demeuşılerı atynan jalpy sany 90 bas jylqy men 10 avtokölık syilyq retınde berıldı.
Erekşe atap öterlıgı, ūly Abaidyŋ jaqsy körgen oiyny toǧyzqūmalaq saiysy men 180 şaqyrymdyq ultramarafonǧa elımız boiynşa tūŋǧyş ret avtokölık syiǧa tartyldy. Semei men Qarauyl arasyn 19 saǧat, 9 minutta jügırıp ötken Baubek İliasov (Batys Qazaqstan oblysy) jarys jeŋımpazy atandy. Toǧyzqūmalaq saiysynda şymkenttık Ǧalymjan Temırbaev bırınşı oryndy ielendı. «Tüie baluan» saiysynda maŋǧystaulyq Nūrdäulet Jarylǧapov, «Ögız paluan» saiysynda almatylyq Jıger Erkınūly qarsylas şaq keltırmedı. «Top bäigede» Almaty oblysynyŋ, «Alaman bäigede» Pavlodar qalasynyŋ, jorǧa jarysynda Qyrǧyzstannyŋ jüirıgı top jardy. Jüldegerlerdıŋ barlyǧy kölıktı boldy. «Jetı qazyna» festivalınıŋ jeŋımpazdary jüldege jylqy aldy.
Oblys äkımı Berık Uäli jorǧa, top bäige, alaman bäige, toǧyzqūmalaq, ultramarafon, qazaqşa küres jarystarynyŋ jeŋımpazdaryn
marapattau saltanatyna qatysty.
Aimaq basşysy mereitoilyq onkündık aiasynda toi toilauǧa emes, oi oilauǧa, ruhani, ziiatkerlık, tanymdyq, sporttyq şaralarǧa basa män berılgenın aitty.
«Jalpy, 10 kündık ıs-şara eldıŋ bereke-bırlıgınıŋ arqasynda joǧary deŋgeide öttı dep esepteimın. «Abai akademiiasy» atty ensiklopediialyq portal aşyldy. Bırneşe kıtaptyŋ tūsauy kesıldı. Myŋnan astam komanda qatysqan «Abai kuiz» intellektualdyq oiyny ötkızıldı. Zaǧip jandar men naşar köretın azamattarǧa arnalǧan kıtaphana ıske qosyldy. Özderıŋız körgendei, jülde qorlarynyŋ är aimaqqa, tıptı qyrǧyz elıne deiın ketkenı quantady. Osy rette toidyŋ joǧary deŋgeide ötuıne atsalysqan oblystyŋ janaşyr azamattaryna alǧys aitamyn» dedı aimaq basşysy.
Sonymen qatar, Abai audanynyŋ Qarauyl auyly maŋyndaǧy Qarauyltöbede «Abai elı» stellasy paidalanuǧa berıldı. Būl nysan audan qonaqtary üşın auyldyŋ körkem kelbetın biıkten tamaşalauǧa mümkındık beretın erekşe körıktı orynǧa ainalmaq.
On künge sozylǧan häkım toiy Qarauyltöbede «Jelsız tünde jaryq ai» gala-konsertımen tüiındeldı.
