تەگەران قالاسىندا ۇلى اقىن اباي قۇنانبايۇلىنىڭ شىعارماشىلىعى مەن رۋحاني مۇراسىن ناسيحاتتاۋعا ارنالعان حالىقارالىق سەمينار ءوتتى. بۇل تۋرالى سىرتقى ىستەر مينيسترلىگى جازدى، دەپ حابارلايدى «ادىرنا» ءتىلشىسى.
«Abai’s Legacy – World Pride of Kazakhstan» اتتى ءىس-شارا ەكونوميكالىق ىنتىماقتاستىق ۇيىمىنىڭ (ەىۇ) مادەنيەت ينستيتۋتىندا ۇيىمداستىرىلعان.
سەمينارعا تەگەراندا اككرەديتتەلگەن شەتەلدىك ديپلوماتيالىق وكىلدىكتەر مەن حالىقارالىق ۇيىمداردىڭ باسشىلارى، ابايتانۋشى عالىمدار، زيالى قاۋىم جانە بۇقارالىق اقپارات قۇرالدارىنىڭ وكىلدەرى قاتىسقان.
ءىس-شارانىڭ اشىلۋىندا ەىۇ مادەنيەت ينستيتۋتىنىڭ پرەزيدەنتى مۇحامماد حاسان اباي شىعارماشىلىعىنا جوعارى باعا بەرىپ، اقىننىڭ رۋحاني مۇراسى ۇيىمعا مۇشە مەملەكەتتەردىڭ ورتاق يگىلىگى ەكەنىن اتاپ وتكەن.
قازاقستاننىڭ يرانداعى ەلشىسى وڭتالاپ وڭالباەۆ «ۇلى اباي تۋرالى» تاقىرىبىندا بايانداما جاساپ، اقىننىڭ ويشىل، اعارتۋشى جانە قازاق ۇلتتىق ادەبيەتىنىڭ نەگىزىن قالاۋشى رەتىندەگى رولىنە توقتالعان.
ەلشى ءوز سوزىندە ابايدىڭ ءبىلىم، ەڭبەك، ادالدىق، حالىق بىرلىگى جانە ادىلەتتى قوعام قۇرۋ جونىندەگى يدەيالارىنىڭ ماڭىزدىلىعىنا نازار اۋدارعان. ونىڭ ايتۋىنشا، اقىن كوتەرگەن ماسەلەلەر قازىرگى قوعام ءۇشىن دە وزەكتىلىگىن جوعالتقان جوق.
سەمينار بارىسىندا اباي مۇراسىنىڭ حالىقارالىق ماڭىزى دا ءسوز بولعان. اقىن شىعارمالارىنىڭ كوپتەگەن تىلدەرگە، سونىڭ ىشىندە پارسى تىلىنە اۋدارىلعانى ايتىلعان. سونىمەن قاتار شىعىس ادەبيەتى اباي شىعارماشىلىعىنىڭ ماڭىزدى قاينار كوزدەرىنىڭ ءبىرى بولعانى اتاپ وتىلگەن.
ءىس-شارا اياسىندا قازاقستان، قىرعىزستان، يران جانە وزبەكستان عالىمدارى اباي شىعارماشىلىعى مەن رۋحاني مۇراسىنىڭ ءتۇرلى قىرلارىنا ارنالعان باياندامالار جاساعان. قاتىسۋشىلارعا اقىننىڭ باي مۇراسى تۋرالى بەينەسيۋجەت تە كورسەتىلگەن.
