10 تامىزدا قازاقستاندا اباي كۇنى اتاپ وتىلەدى. وسى داتاعا وراي ۇلتتىق ستاتيستيكا بيۋروسى ۇلى اقىننىڭ ەسىمىمەن اتالعان قازاقستاندىقتاردىڭ سانى مەن اباي ەسىمىنە قاتىستى قىزىقتى ستاتيستيكانى جاريالادى، دەپ حابارلايدى "ادىرنا".
بيۋرو مالىمەتىنشە، بۇگىندە قازاقستاندا اباي ەسىمدى 18 961 ادام تۇرادى.
اباي ەسىمى ەڭ كوپ تارالعان وڭىرلەردىڭ كوشىن استانا باستاپ تۇر. ەلوردادا وسىنداي ەسىمدى 2 186 ادام تىركەلگەن. ەكىنشى ورىندا – تۇركىستان وبلىسى، مۇندا 2 008 اباي بار. ال الماتى قالاسىندا ۇلى اقىننىڭ ەسىمىن يەلەنگەن 1 740 ادام تۇرادى.
ستاتيستيكاعا سايكەس، اباي ەسىمدى ەڭ قارت قازاقستاندىق 1932 جىلى دۇنيەگە كەلگەن.
ال بۇل ەسىم يەلەرىنىڭ اراسىندا ەڭ كوپ كەزدەسەتىن جاس ساناتى – 30-34 جاس ارالىعى. وسى جاستاعى ابايلاردىڭ سانى 3 267 ادامدى قۇرايدى.
ۇلى اقىننىڭ ەسىمى كەيىنگى ۇرپاق اراسىندا دا سۇرانىسىن جوعالتپاعان. ماسەلەن، 2024 جىلدىڭ العاشقى التى ايىندا 91 نارەستەگە اباي ەسىمى بەرىلگەن.
اباي ەسىمى نەگىزىنەن ەر ادامدارعا قويىلعانىمەن، قازاقستاندا بۇل ەسىممەن تىركەلگەن توعىز ايەل ادام دا بار.
ۇلى اقىننىڭ ەسىمى قازاقستاننىڭ ەلدى مەكەندەرىندە دە كەڭىنەن كەزدەسەدى. ابايدىڭ قۇرمەتىنە ەلىمىزدە ءبىر وبلىس، ءبىر قالا، ءۇش اۋدان جانە 26 اۋىل اتالعان.
سونىمەن قاتار ۇلتتىق ستاتيستيكا بيۋروسى ابايدىڭ ازان شاقىرىپ قويعان اتى – يبراھيم ەسىمىنىڭ تارالۋىنا قاتىستى دا دەرەك كەلتىردى. قازاقستاندا يبراھيم، يبراگيم جانە يبراحيم نۇسقالارىمەن تىركەلگەن 37 844 ادام بار.
ايتا كەتەيىك، 10 تامىز – اباي كۇنى. بۇل داتا ۇلى اقىن، اعارتۋشى، كومپوزيتور ءارى قازاقتىڭ جازبا ادەبيەتىنىڭ نەگىزىن قالاۋشى اباي قۇنانبايۇلىنىڭ تۋعان كۇنىنە وراي بەلگىلەنگەن.
