وبلىس اكىمى ناريمان تورەعاليەۆتىڭ توراعالىعىمەن چاپاي-جاڭاقالا-سايحىن باعىتىنداعى تاس جولدا ورىن العان قايعىلى جول-كولىك وقيعاسىنىڭ ءمان-جايىن انىقتاۋ جانە زارداپ شەككەندەرگە كومەك كورسەتۋدى ۇيىمداستىرۋ جونىندەگى كوميسسيا قۇرىلدى.
قازاقستان رەسپۋبليكاسى ۇكىمەتىنىڭ تاپسىرماسىنا سايكەس قۇرىلعان جۇمىس توبى جاڭاقالا اۋدانىندا ورىن العان جول-كولىك وقيعاسىنا بايلانىستى ونىڭ ءمان-جايىن تولىق ءارى وبەكتيۆتى انىقتاۋدى، سونداي-اق زارداپ شەككەندەرگە قاجەتتى كومەك كورسەتۋدى، جول-كولىك وقيعاسىنىڭ سەبەپتەرى مەن ءمان-جايىنا تالداۋ جۇرگىزىپ، قۇزىرەتتى ورگاندارمەن ءوزارا ءىس-قيمىلدى قامتاماسىز ەتەدى. كوميسسيا قۇرامىنا وبلىس پروكۋرورى، وبلىستىق پوليتسيا دەپارتامەنتى، توتەنشە جاعدايلار دەپارتامەنتى جانە سالالىق باسقارمالار باسشىلارى، جاڭاقالا اۋدانىنىڭ اكىمى ەنگىزىلدى.
وبلىس اكىمى قيىن ءساتتى وتكەرىپ وتىرعان وتباسىلاردىڭ قايعىسىنا ورتاقتاسىپ:
«بۇل - بۇكىل ءوڭىرىمىز ءۇشىن وتە وكىنىشتى جاعداي. اۋىر قازا قانشاما وتباسىنا ورنى تولماس قايعى اكەلدى. زارداپ شەككەندەرگە ءتيىستى مەديتسينالىق جاردەم بەرىلەدى، ال قازا تاپقانداردىڭ وتباسىلارىنا زاڭ اسىندا كومەك كورسەتىلەتىن بولادى»، - دەدى.
ءوڭىر باسشىسى جاڭاقالا اۋدانىنىڭ اكىمىنە قازا تاپقان جانداردىڭ جەرلەۋ ءراسىمىن ۇيىمداستىرۋدى، سونداي-اق زارداپ شەككەندەر مەن قازا تاپقانداردىڭ وتباسىلارىنا بارلىق قاجەتتى مەديتسينالىق جانە پسيحولوگيالىق كومەك كورسەتۋدى تاپسىردى
17 قاراشا كۇنى چاپاي – جاڭاقالا - سايحىن باعىتىنداعى تاس جولدىڭ 50-شاقىرىمىندا Toyota Camry جانە Volkswagen Sharan اۆتوكولىكتەرىنىڭ سوقتىعىسۋى سالدارىنان جول-كولىك وقيعاسى ورىن الىپ، ەكى كولىكتىڭ ءبىرى ورتەنگەن. وقيعا ورنىندا 8 ادام قازا تاۋىپ، 4 ادام اقجايىق اۋداندىق اۋرۋحاناسىنا جەتكىزىلدى.
اتالعان دەرەك بويىنشا قىلمىستىق ءىس قوزعالدى. قازا تاپقان ازاماتتار جاڭاقالا اۋدانىنىڭ مۇقىر، جاڭاقالا، قىزىلوبا، ماشتەكساي اۋىلدارىنىڭ جانە قاراتوبە اۋدانىنىڭ ەگىندىكول اۋىلىنىڭ تۇرعىندارى.
