ورالدا الاياقتىق جاسادى دەپ ايىپتالعان بلوگەر اسلان وتەپوۆ تەرگەۋ يزولياتتورىندا اشتىق جاريالادى. بۇل تۋرالى "ۋرالسكايا نەدەليا" جازدى، دەپ حابارلايدى “ادىرنا” ۇلتتىق پورتالى.
ورالدا بەلگىلى بلوگەردىڭ سوتى ءجۇرىپ جاتىر. سوت تالقىلاۋى بارىسىندا پروكۋرور وتەپوۆتى 7,5 جىلعا باس بوستاندىعىنان ايىرۋدى سۇرادى.
وتەپوۆ تۇرمە كامەراسىنان ۆيدەوۇندەۋ جاساپ، 3 كۇندىك اشتىق جاريالاعانىن مالىمدەدى. بلوگەر ءوز مالىمدەمەسىندە بىرقاتار قۇقىق قورعاۋ ورگاندارى قىزمەتكەرىن كىنالى دەپ ساناۋدى سۇرادى.
قورعاۋشى تاراپ ازاماتتىق بەلسەندىگە قارسى قىلمىستىق ءىستىڭ استارىندا ترامادولدى زاڭسىز ساتۋعا قارسى كۇرەسىنە بايلانىستىرىپ وتىر.
ەسكە سالايىق، اسلان وتەپوۆ الاياقتىق جاسادى جانە پارا بەرۋگە شاقىردى دەپ ايىپتالعان. سوت وتىرىسىندا ول بالالار ءۇيىنىڭ تاربيەلەنۋشىسى جانە كامەلەتكە تولماعان ءۇش بالانى تاربيەلەپ وتىرعاندىقتان، ءوزىن باس بوستاندىعىنان ايىرماۋدى سۇرادى.
"مەن رەسمي تۇردە ءۇش كۇننەن بەرى اشتىق جاريالاپ وتىرمىن. ەگەر اشتىق جاريالاعان سوڭ باسىما قانداي دا ءبىر قيىندىق تۇسسە، مىنا ادامداردى كىنالاۋىڭىزدى سۇرايمىن: بىرىنشىدەن، وتىنىشكە زاڭسىز قول قويعان ورال قالاسىنىڭ پروكۋرورى ساتباەۆ ازاماتتى. سودان سوڭ سەميليدي اناستاسيانى. 1976 جىلى تۋعان سۋديا كارپوۆ نيكولاي دا بار", - دەيدى وتەپوۆ ۆيدەودا.
وتەپوۆ بۇل شەشىمدى ءوزى قابىلداعانىن جانە ءوزى قاماۋدا وتىرعان مەكەمە اكىمشىلىگىنە ەشقانداي تالاپتارى جوق دەپ سەندىردى.
