عىلىم جانە جوعارى ءبىلىم مينيسترلىگى 2025-2026 وقۋ جىلىنا ارنالعان مەملەكەتتىك ءبىلىم بەرۋ گرانتتارى يەگەرلەرىنىڭ ءتىزىمىن جاريالادى، دەپ حابارلايدى «ادىرنا» ءتىلشىسى.
پرەزيدەنت قاسىم-جومارت توقاەۆتىڭ تاپسىرماسىنا سايكەس، ەكونوميكانىڭ باسىم سالالارى ءۇشىن جوعارى بىلىكتى كادرلاردى دايارلاۋ ماقساتىندا ءبىلىم بەرۋ گرانتتارىنىڭ جالپى سانىنىڭ 60%-ى ينجەنەرلىك جانە تەحنيكالىق باعىتتار بويىنشا بولىنگەن.
كونكۋرس قورىتىندىسى بويىنشا مەملەكەتتىك ءبىلىم بەرۋ تاپسىرىسى 99%-عا يگەرىلگەن.
«بيىل «سەرپىن» باعدارلاماسى حالىق تىعىز قونىستانعان وڭىرلەردىڭ جاستارى اراسىندا ۇلكەن قىزىعۋشىلىق تۋدىردى. كونكۋرس ناتيجەسى بويىنشا 2 مىڭنان استام گرانت يەگەرى قازاقستاننىڭ سولتۇستىك، شىعىس جانە ورتالىق وڭىرلەرىندەگى الدىڭعى قاتارلى جوعارى وقۋ ورىندارىندا ءبىلىم الاتىن بولادى.
2025 جىلعى مەملەكەتتىك ءبىلىم بەرۋ گرانتتارىن تاعايىنداۋ كونكۋرسىنا 113 مىڭعا جۋىق ءوتىنىش قابىلداندى، بۇل وتكەن جىلمەن سالىستىرعاندا 9 مىڭعا كوپ»،—دەلىنگەن حابارلامادا.
گرانت ناتيجەلەرىن قر عىلىم جانە جوعارى ءبىلىم مينيسترلىگىنىڭ رەسمي اقپاراتتىق كوزدەرىنەن https://www.gov.kz/memleket/entities/sci?lang=kk, https://t.me/gylym_jogary_bilim, سونداي-اق ۇلتتىق تەستىلەۋ ورتالىعىنىڭ رەسمي سايتىنان www.testcenter.kz بىلۋگە بولادى.
مەملەكەتتىك ءبىلىم بەرۋ گرانتى تۋرالى كۋالىك ءۇش جۇمىس كۇنى ىشىندە قر عجبم ۇلتتىق تەستىلەۋ ورتالىعىنىڭ https://grant.testcenter.kz سايتىندا قولجەتىمدى بولادى.
ايتا كەتەيىك، جوعارى وقۋ ورىندارىنا قۇجاتتاردى تاپسىرۋ 25 تامىزعا دەيىن (قوسا العاندا) جۇزەگە اسىرىلادى.
