اقتوبەدە 19 جاسار ستۋدەنتتىڭ دەنەسى كوپىر استىنان تابىلدى، دەپ حابارلايدى "ادىرنا" ءتىلشىسى قازاقپاراتقا سىلتەمە جاساپ.
وسىدان بىرنەشە كۇن بۇرىن اقتوبە قالاسىندا 2004 جىلى تۋعان جىگىتكە ىزدەۋ جاريالانىپ، ەرىكتىلەر حابارلاما تاراتقان بولاتىن. ستۋدەنت 13-قىركۇيەك كۇنى ساعات 17:00 شاماسىندا ۇيىنەن شىعىپ كەتىپ، قايتا ورالماعان. كەيىن ستۋدەنتتىڭ دەنەسى تابىلدى.
«14-قىركۇيەك كۇنى ساعات 19:30-دا زارەچنىي اۋىلىنىڭ قاسىنداعى كوپىردىڭ استىنان، «يۋرتا» مەيرامحاناسىنىڭ جانىنان 19 جاستاعى جىگىتتىڭ ءمايىتى تابىلدى. وقيعا ورنىنا جەدەل-تەرگەۋ توبى شىقتى. قىلمىستىق كودەكستىڭ «ءوزىن-ءوزى ولتىرۋگە دەيىن جەتكىزۋ» بابى بويىنشا سوتقا دەيىنگى تەرگەۋ باستالدى. سەبەپتەرى انىقتالىپ جاتىر. ساراپتاما تاعايىندالدى»،- دەپ حابارلادى وبلىستىق پوليتسيا دەپارتامەنتى ءباسپاسوز قىزمەتىنىڭ جەتەكشىسى ەربولات سارقۇلوۆ.
قايتىس بولعان ستۋدەنت ق.جۇبانوۆ اتىنداعى اقتوبە وڭىرلىك ۋنيۆەرسيتەتىندە وقيتىنى بەلگىلى بولدى.
«جۇبانوۆ ۋنيۆەرسيتەتى دۇنيەدەن وزعان ستۋدەنتتىڭ اتا-اناسىنا جانە جاقىندارىنا قايعىرىپ كوڭىل ايتادى. ستۋدەنتتىڭ اتى-ءجونى ونىڭ وتباسىنا دەگەن قۇرمەت پەن جەكە دەرەكتەرىن ساقتاپ قالۋ ءۇشىن جاريالانبادى. ول جارقىن ءجۇزدى، بولاشاعىنان ءۇمىت كۇتتىرەتىن ستۋدەنتتەردىڭ ءبىرى ەدى. ساباق ۇلگەرىمى جاقسى، بەلسەندى ستۋدەنتتەردىڭ قاتارىندا بولدى. بۇل – ءبارىمىز ءۇشىن دە ورنى تولماس قايعىلى جاعداي. قالالىق پوليتسيا دەپارتامەنتىندە اتالعان جاعداي بويىنشا تەرگەۋ ءىس-شارالارى ءجۇرىپ جاتىر. ۋنيۆەرسيتەت تاراپىنان ءبىلىم الۋشىنىڭ وتباسىنا بارىنشا قولداۋ كورسەتىلەدى»،- دەپ حابارلادى ۋنيۆەرسيتەتتىڭ ءباسپاسوز قىزمەتى.
ۇقساس جاڭالىقتار
