ۋكراينا پرەزيدەنتى ۆلاديمير زەلەنسكي اقش پرەزيدەنتى دونالد ترامپپەن تەلەفون ارقىلى سويلەستى، دەپ حابارلايدى "ادىرنا" ۇلتتىق پورتالى.
زەلەنسكيدىڭ ايتۋىنشا، ترامپپەن مايدانداعى جاعدايعا قاتىستى پىكىر الماسقان. سونىمەن قاتار، رەسەيگە قارسى ىقتيمال سانكتسيالار تالقىلانعان.
«ەڭ باستىسى — سوعىستى توقتاتۋ. اقش پرەزيدەنتىنە ادىلەتتى ءارى ۇزاق مەرزىمدى بەيبىتشىلىك ءۇشىن جاساپ جاتقان كۇش-جىگەرى ءۇشىن العىسىمىزدى بىلدىرەمىز. قازىر نيدەرلاندى، شۆەتسيا، نورۆەگيا جانە دانيادان شەشىم شىقتى — ۋكراينا اقش قارۋىنا 1 ميلليارد دوللاردان استام كومەك الادى. ناتو ەلدەرىمەن بۇل ىنتىماقتاستىق جالعاسا بەرەدى»، — دەپ اتاپ ءوتتى زەلەنسكي.
ۋكراينا پرەزيدەنتىنىڭ پىكىرىنشە، ترامپ ۋادە ەتكەن رەسەيگە قارسى سانكتسيالار كوپ نارسەنى وزگەرتە الادى. بۇعان دەيىن اقش پرەزيدەنتى پگەر قاقتىعىستى رەتتەۋ ىسىندە ىلگەرىلەۋ بولماسا رەسەيگە جانە ونىمەن ساۋدا جاسايتىن ارىپتەستەرىنە قارسى قوسىمشا سالىقتار ەنگىزۋگە ۋادە بەرگەن بولاتىن. بۇل ۋلتيماتۋم 8 تامىزدا اياقتالادى.
بۇعان قوسا، ەكىجاقتى قورعانىس سالاسىنداعى ىنتىماقتاستىق تا تالقىلانعان.
«دروندارعا قاتىستى كەلىسىم جوباسىن ۋكراينا تاراپى ازىرلەپ قويدى، ءبىز ونى ەگجەي-تەگجەيلى تالقىلاۋعا جانە بەكىتۋگە دايىنبىز. بۇل ەڭ مىقتى كەلىسىمدەردىڭ ءبىرى بولۋى مۇمكىن»، — دەدى زەلەنسكي.
