بۇگىن، 5 تامىز كورنەكتى شىعىستانۋشى، تاريح عىلىمدارىنىڭ دوكتورى، پروفەسسور، قر ۇعا اكادەميگى بولات ەشمۇحامبەتۇلى كومەكوۆتىڭ 85 جاسقا تولدى، دەپ حابارلايدى “ادىرنا”.
بولات كومەكوۆ – قازاق عىلىمىنىڭ اسا ءىرى وكىلدەرىنىڭ ءبىرى. ول 1940 جىلى 5 تامىز كۇنى تاراز قالاسىندا دۇنيەگە كەلىپ، بۇكىل عۇمىرىن شىعىستانۋ مەن ورتاعاسىرلىق قازاقستان تاريحىن زەرتتەۋگە ارنادى. 1963 جىلى تاشكەنت مەملەكەتتىك ۋنيۆەرسيتەتىنىڭ شىعىستانۋ فاكۋلتەتىن تامامداعان سوڭ، اراب، پارسى جانە كونە تۇركى تىلدەرىندەگى تاريحي دەرەككوزدەردى تەرەڭ زەرتتەۋ ارقىلى وتاندىق تاريح عىلىمىن جاڭا بەلەسكە كوتەردى.
عالىمنىڭ باستى عىلىمي باعىتتارىنىڭ ءبىرى – ەجەلگى جانە ورتاعاسىرلىق قازاقستان مەن ورتالىق ازيا حالىقتارىنىڭ تاريحي-مادەني دامۋىن، ساياسي قۇرىلىمىن جازبا دەرەكتەر ارقىلى دالەلدەۋ. اسىرەسە قيماق، قىپشاق، وعىز تايپالارىنا قاتىستى تىڭ دەرەكتەردى عىلىمي اينالىمعا ەنگىزگەنى – كومەكوۆ ەسىمىن حالىقارالىق دەڭگەيدەگى تاريحشىلار قاتارىنان ويىپ تۇرىپ ورىن الۋعا نەگىزدەدى.
پروفەسسور 420-دان استام عىلىمي ەڭبەك جاريالاپ، ولاردىڭ ىشىندە مونوگرافيالار، ەنتسيكلوپەديالىق ماقالالار، قازاقستان تاريحىنىڭ اكادەميالىق باسىلىمدارىنىڭ اۆتورى جانە رەداكتورى بولدى. ول سونداي-اق حالىقارالىق قىپشاقتانۋ كونفەرەنتسيالارىن ۇيىمداستىرىپ، ەۋروپا، تاياۋ شىعىس جانە تمد ەلدەرىنىڭ تاريحشىلارىمەن بايلانىس ورناتتى.
عىلىمي ەڭبەكتەرى ءۇشىن بولات كومەكوۆ مەملەكەتتىك سىيلىقتىڭ يەگەرى اتاندى. ول – قازاقستاننىڭ عىلىمىنا سىڭىرگەن ەرەن ەڭبەگى ءۇشىن مەملەكەتتىك ماراپاتتارمەن جانە «قۇرمەت» وردەنىمەن ماراپاتتالعان زيالى تۇلعا.
بۇگىندە ونىڭ شاكىرتتەرى – ەلىمىزدىڭ ءتۇرلى عىلىمي-زەرتتەۋ ينستيتۋتتارىندا، ۋنيۆەرسيتەتتەرىندە جانە سىرت ەلدەردە تابىستى ەڭبەك ەتىپ جۇرگەن كورنەكتى عالىمدار.
ۇلت تاريحىن تەرەڭنەن تولعاپ، جازبا دەرەكتەرگە نەگىزدەپ، عىلىمنىڭ بيىگىنە كوتەرگەن اكادەميك بولات كومەكوۆتى 85 جىلدىق مەرەيتويىمەن قۇتتىقتايمىز! زور دەنساۋلىق، قاجىماس قايرات جانە شىعارماشىلىق شابىت تىلەيمىز!
