اقش پرەزيدەنتى دونالد ترامپ 31 شىلدە كۇنى قازاقستان مەن تاعى بىرنەشە ەلدىڭ تاۋارلارىنا كەدەندىك باج سالىعىن ەنگىزۋ تۋرالى جارلىققا قول قويدى، دەپ حابارلايدى "ادىرنا" ۇلتتىق پورتالى.
اق ءۇيدىڭ رەسمي سايتىندا جاريالانعان قۇجاتتارعا سايكەس، قازاقستان تاۋارلارىنا 25 پپايىزدىق باج سالىعى سالىنادى. اتالعان جارلىق 1 تامىزدان باستاپ ەمەس، ءبىر اپتادان كەيىن كۇشىنە ەنەدى.
وسىعان قاتىستى قر ساۋدا جانە ينتەگراتسيا مينيسترلىگىنىڭ مالىمەتىنشە، قازاقستان اقش تاراپىنان ەنگىزىلگەن جاڭا تاريفتەر بويىنشا كەلىسسوزدەردى جالعاستىرىپ جاتقانىن مالىمدەدى.
ماۋسىم ايىندا ەكى ەلدىڭ ۋاكىلەتتى ورگاندارى اراسىندا ەكىجاقتى كەزدەسۋ وتكەن. وندا قازاقستان اقش-قا ءوز ۇسىنىستارىن جىبەرىپ، ءوزارا ءتيىمدى ساۋدانى دامىتۋ، تۇراقتى جەتكىزىلىمدى ساقتاۋ جانە نارىققا ادىلەتتى قولجەتىمدىلىكتى قامتاماسىز ەتۋ ماسەلەلەرىن كوتەرگەن.
"ەكى تاراپ ۇسىنىستاردى كەڭەيتىلگەن ساۋدا-ەكونوميكالىق ديالوگ اياسىندا تالقىلاۋدى جالعاستىرىپ جاتىر. قازاقستان كونسترۋكتيۆتى ىنتىماقتاستىققا دايىن ەكەنىن ءبىلدىردى، ال امەريكالىق تاراپ ديالوگتى جالعاستىرۋعا ءازىر ەكەنىن راستادى،" – دەلىنگەن مينيسترلىك مالىمدەمەسىندە.
مينيسترلىك مالىمەتىنشە، جاڭا تاريفتەر قازاقستاننىڭ اقش-قا جالپى ەكسپورتىنىڭ تەك 4,8 پايىزىنا عانا اسەر ەتەدى. قالعان 95,2 پايىزى باج سالىعىنان بوساتىلعان. اتاپ ايتقاندا، مۇناي، ۋران، كۇمىس، فەرروقورىتپا، تانتال، تيتان جانە بەريللي سياقتى ستراتەگيالىق شيكىزات ونىمدەرى شەكتەۋگە ۇشىرامايدى.
اقش پرەزيدەنتى بۇل شارالاردىڭ ماقساتتى تۇردە قازاقستانعا باعىتتالماعانىن ايتتى.
"بۇل تاريفتەر ساۋدا كەدەرگەلەرىن جويۋ ءۇشىن قاجەت. ساۋدا تەڭگەرىمسىزدىگى – اقش ەكونوميكاسى مەن ۇلتتىق قاۋىپسىزدىگىنە ناقتى قاۋىپ توندىرەدى", - دەدى ترامپ.
25 پايىزدىق باج سالىعى فوسفور، فەرروسيليتسي، وپتيكالىق لينزالار، پشەنيچنايا كلەيكوۆينا (گليۋتەن) جانە اممياك سەليتراسىنا (نيترات اممونيا) قاتىستى قولدانىلادى. ايتا كەتەيىك، 2025 جىلدىڭ العاشقى جارتىسىندا اقش-قا 6 500 توننا گليۋتەن، 2 200 توننا سارى فوسفور جانە 1 483 توننا فەرروسيليتسي جونەلتىلگەن. ال اممياك سەليتراسى ەكسپورتتالماعان.
