بۇگىن، 28 شىلدە كۇنى اقتاۋداعى «جىلى جاعاجاي» اۋماعىندا «تازا قازاقستان» جالپىۇلتتىق ەكولوگيالىق اكتسياسى اياسىندا جاپپاي سەنبىلىك ۇيىمداستىرىلدى. ءىس-شاراعا ماڭعىستاۋ وبلىسى اكىمىنىڭ ورىنباسارلارى، اقتاۋ قالاسىنىڭ اكىمى، كوممۋنالدىق قىزمەت وكىلدەرى، مەملەكەتتىك قىزمەتشىلەر، «جاسىل ەل» ەڭبەك جاساعى مەن جاستار اتسالىستى.
تازالىق جۇمىستارىنا كوممۋنالدىق سالا مەكەمەلەرىمەن قاتار وزگە دە ۇيىمداردان بارلىعى 400-گە جۋىق قىزمەتكەر مەن 4 ارنايى تەحنيكا جۇمىلدىرىلىپ، ناتيجەسىندە 12 توننا تۇرمىستىق قالدىق شىعارىلدى.
وبلىس اكىمىنىڭ ورىنباسارى تىلەگەن ابىشەۆ اكتسيا بارىسىندا ءوڭىر تۇرعىندارى مەن دەمالۋشىلاردى ەكولوگيالىق مادەنيەتتى قالىپتاستىرۋعا، تابيعاتقا ۇقىپتى قاراۋعا شاقىردى.
"بۇگىنگى سەنبىلىكتىڭ باستى ماقساتى - كاسپي تەڭىزى جاعالاۋىن قوقىس قالدىقتارىنان تازارتىپ، حالىق اراسىندا دەمالىس مادەنيەتىن قالىپتاستىرۋعا ۇندەۋ. وكىنىشكە قاراي، سوڭعى ۋاقىتتا جاعالاۋدا قوقىس قالدىرۋ دەرەكتەرى جيىلەپ كەتتى. كۇنى كەشە عانا بۇل اۋماققا 8 مىڭعا جۋىق كولىك پەن 30 مىڭنان استام ادام كەلىپ، دەمالدى. الايدا كوپشىلىگى دەمالىستان كەيىن ارتىندا قالدىقتارىن جيناماي، سول كۇيى تاستاپ كەتكەن. سونىڭ سالدارىنان ەرىكتىلەرمەن بىرگە تاۋ-تاۋ بولىپ جينالعان قوقىستى ءوزىمىز جيناپ ءجۇرمىز. قازىرگى تاڭدا جاعالاۋداعى تازالىقتى ساقتاۋ ءۇشىن كوممۋنالدىق قىزمەتتىڭ 80-گە جۋىق مامانى جۇمىس ىستەۋدە. دەگەنمەن، دەمالۋشىلاردىڭ سوڭىنان قوقىس قالدىرۋى ءالى دە توقتار ەمەس. ارنايى قوقىس جاشىكتەرى ورناتىلعانىنا قاراماستان، كەيبىر ازاماتتار 50 قادام جەردەگى كونتەينەرگە بارىپ قوقىسىن تاستاۋعا بارماي وتىر. ەكولوگيالىق اكتسيا - ءبىر كۇندىك شارا ەمەس، بۇل باعىتتاعى جۇمىس جىل بويى جالعاسادى. وسى رەتتە بارشا حالىقتى تابيعاتتى ايالاۋعا، ەكولوگيالىق مادەنيەتتى قالىپتاستىرۋعا شاقىرامىز", - دەدى تىلەگەن ابىشەۆ.
ايتا كەتەيىك، 2023 جىلى ماڭعىستاۋ وبلىسىنا 390 مىڭعا جۋىق تۋريست كەلگەن بولسا، وتكەن جىلى بۇل كورسەتكىش 420 مىڭعا جەتكەن. ال بيىلعى شومىلۋ ماۋسىمىندا وڭىرگە 500 مىڭنان استام دەمالۋشى كەلگەن.
رەسمي مالىمەتتەرگە سايكەس، بيىل تابيعاتتى قورعاۋ پوليتسياسى تاراپىنان تابيعي اۋماقتاردى لاستاعانى، قوقىس قالدىرعانى جانە رۇقسات ەتىلمەگەن جەرلەردە ەكولوگيالىق قۇقىقبۇزۋشىلىقتار بويىنشا 1000-عا جۋىق اكىمشىلىك حاتتاما تولتىرىلىپ، جالپى سوماسى 70 ميلليون تەڭگەدەن استام ايىپپۇل سالىنعان.
