Bügın, 28 şılde künı Aqtaudaǧy «Jyly jaǧajai» aumaǧynda «Taza Qazaqstan» jalpyūlttyq ekologiialyq aksiiasy aiasynda jappai senbılık ūiymdastyryldy. Is-şaraǧa Maŋǧystau oblysy äkımınıŋ orynbasarlary, Aqtau qalasynyŋ äkımı, kommunaldyq qyzmet ökılderı, memlekettık qyzmetşıler, «Jasyl el» eŋbek jasaǧy men jastar atsalysty.
Tazalyq jūmystaryna kommunaldyq sala mekemelerımen qatar özge de ūiymdardan barlyǧy 400-ge juyq qyzmetker men 4 arnaiy tehnika jūmyldyrylyp, nätijesınde 12 tonna tūrmystyq qaldyq şyǧaryldy.
Oblys äkımınıŋ orynbasary Tılegen Äbışev aksiia barysynda öŋır tūrǧyndary men demaluşylardy ekologiialyq mädeniettı qalyptastyruǧa, tabiǧatqa ūqypty qarauǧa şaqyrdy.
"Bügıngı senbılıktıŋ basty maqsaty - Kaspii teŋızı jaǧalauyn qoqys qaldyqtarynan tazartyp, halyq arasynda demalys mädenietın qalyptastyruǧa ündeu. Ökınışke qarai, soŋǧy uaqytta jaǧalauda qoqys qaldyru derekterı jiılep kettı. Künı keşe ǧana būl aumaqqa 8 myŋǧa juyq kölık pen 30 myŋnan astam adam kelıp, demaldy. Alaida köpşılıgı demalystan keiın artynda qaldyqtaryn jinamai, sol küiı tastap ketken. Sonyŋ saldarynan erıktılermen bırge tau-tau bolyp jinalǧan qoqysty özımız jinap jürmız. Qazırgı taŋda jaǧalaudaǧy tazalyqty saqtau üşın kommunaldyq qyzmettıŋ 80-ge juyq mamany jūmys ısteude. Degenmen, demaluşylardyŋ soŋynan qoqys qaldyruy älı de toqtar emes. Arnaiy qoqys jäşıkterı ornatylǧanyna qaramastan, keibır azamattar 50 qadam jerdegı konteinerge baryp qoqysyn tastauǧa barmai otyr. Ekologiialyq aksiia - bır kündık şara emes, būl baǧyttaǧy jūmys jyl boiy jalǧasady. Osy rette barşa halyqty tabiǧatty aialauǧa, ekologiialyq mädeniettı qalyptastyruǧa şaqyramyz", - dedı Tılegen Äbışev.
Aita keteiık, 2023 jyly Maŋǧystau oblysyna 390 myŋǧa juyq turist kelgen bolsa, ötken jyly būl körsetkış 420 myŋǧa jetken. Al biylǧy şomylu mausymynda öŋırge 500 myŋnan astam demaluşy kelgen.
Resmi mälımetterge säikes, biyl tabiǧatty qorǧau polisiiasy tarapynan tabiǧi aumaqtardy lastaǧany, qoqys qaldyrǧany jäne rūqsat etılmegen jerlerde ekologiialyq qūqyqbūzuşylyqtar boiynşa 1000-ǧa juyq äkımşılık hattama toltyrylyp, jalpy somasy 70 million teŋgeden astam aiyppūl salynǧan.
