«تۇمسا تابيعاتتى ايالايىق». مەملەكەت قورعاۋىنا الىنعان ۇلتتىق پاركتەردە ءجون-جوسىقسىز قۇرىلىس جۇرگىزۋگە تابيعات جاناشىرلارىنىڭ ءبارى قارسى. سولاردىڭ ءبىرى – اتاقتى تىلەۋحاندار وتباسىنىڭ كەلىنى توعجان قوجاليەۆا. ول پسەۆدووپپوزيتسيالىق «HAQ» ۇيىمىنىڭ جەتەكشىسى. ەكولوگيالىق سانانىڭ تولىسۋىنا ۇلەس قوسۋشى ۇيىمنىڭ ىلە الاتاۋى پاركىن قورعاۋ ءۇشىن جانىن سالىپ، جانتالاسىپ جاتقان قوعامدىق كەڭەستىڭ بەلدى مۇشەسى دە توعجان قوجاليەۆا، دەپ حابارلايدى kznews.kz 1612TV youtube ارناسىنا سىلتەمە جاساپ.
بۇل توعجان قوجاليەۆا بەت-بەينەسىنىڭ حالىققا كورىنىپ تۇرعان جارىق جاعى عانا. ونىڭ كولەڭكەسىندە قاراۋىتىپ كورىنبەي تۇرعان نە نارسە؟ توعجان حالىقتان، قوعامدىق كەڭەستەن نە جاسىرادى؟
2011 جىلى ىلە الاتاۋى ۇلتتىق تابيعي پاركى مەن «روسيمپورتتسەمەنت» جشس دەپ اتالاتىن فيرما ەلىمىزدىڭ قورشاعان ورتانى قورعاۋ ماقساتىندا شىعارىلعان زاڭدارىن بەلدەن باسىپ، قورىقتىڭ 2 گەكتاردان استام جەرىن جالعا الىپ، يگەرۋ جونىندە كەلىسىمشارت جاسادى. ول كەزدە «روسيمپورتتسەمەنتتىڭ» بۇل جەردى قانداي ماقساتتا پايدالاناتىنى بەلگىسىز ەدى. كوزدىڭ قاراشىعىنداي ساقتالۋى ءتيىس تابيعي پاركتە اۋىر قۇرىلىس جۇرگىزۋگە تىيىم سالىنعان. سوعان قاراماي «روسيمپورتتسەمەنت» «Ak Kain Spa Hotel Chalets and Residents» دەپ اتالاتىن بيزنەس جوبانى باستاپ كەتتى. ۇلتتىق پاركتىڭ قاق تورىنەن ويىپ العان اۋماقتى بيىك شارباقپەن قورشاپ، قالتالى تۋريستەر مەن دوكەيلەر دەمالاتىن بىرنەشە كوتتەدج قوناق ءۇيدىڭ قۇرىلىسىن باستاپ كەتتى.
سوندا تۇمسا تابيعاتتى سۇق قولداردان قورعاۋشى قوعامدىق كەڭەس مۇشەلەرى زاڭدى بەلشەسىنەن باسىپ، ەكولوگيانى ءبۇلدىرىپ جاتقان كىم دەگەن سۇراققا جاۋاپ تاپپاي دال بولعان. قوعامدىق كەڭەس مۇشەسى توعجان قوجاليەۆا دا تۇك بىلمەيتىن ادامداي ءمۇلايىمسىپ، باسىن سالبىراتىپ، جاي عانا قارا كورسەتىپ الاڭ جۇرتتىڭ قاتارىندا ءجۇردى. ونىڭ ءدال وسى تۇستا ءۇنسىز قالۋى بەكەر ەمەس ەكەن. سويتسەك، «روسيمپورتتسەمەنت» جەكەمەنشىك فيرماسى حالىق جاناشىرى توعجان قوجاليەۆانىڭ كۇيەۋى مەيرام تىلەۋحانعا تىكەلەي قاتىسى بار بولىپ شىقتى. توعجاننىڭ ەنەسى الماعامبەتوۆا ءاليا سەيىلبەكقىزى «روسيمپورتتسەمەنت» جشس قۇرىلتايشىلارىنىڭ ءبىرى مەيرام ۇلتىمىزدىڭ جاناشىرى بەكبولات تىلەۋحاننىڭ اعاسى رامازاننىڭ ۇلكەن ۇلى. توعجان كەلىننىڭ ىلە الاتاۋى تابيعي پاركىن ءبۇلدىرىپ جاتقان وتباسىلىق فيرمانىڭ توركىنى كىمگە بارىپ تىرەلەتىنىن قوعام بەلسەندىلەرىنە ايتپاي، ءتىلى كەسىلىپ، جۇرتتان جاسىرىپ قالۋىنىڭ سەبەبى وسى.
ىلە الاتاۋىنىڭ تورىنە قامال سالىپ بەكىنىپ، زاڭسىز قۇرىلىس سالىپ العان «روسيمپورتتسەمەنت» الماتى قالالىق ساۋلەت قۇرىلىس باسقارماسىنا ەليتالىق كوتتەدجدەر قۇرىلىسىن جۇرگىزۋگە رۇقسات بەرۋدى سۇراپ ءوتىنىش جازادى. باسقارما ماماندارى اتالعان اۋماق ەرەكشە قورعاۋعا جاتاتىن تابيعات ەكەنىن، وندا قىزىل كىتاپقا ەنگەن اعاشتار بارىن ايتىپ، قۇرىلىس جۇرگىزۋگە رۇقسات بەرمەي قويادى. وعان قاناعاتتانباعان «روسيمپورتتسەمەنت» وكىلى قالالىق ساۋلەت باسقارماسىن سوتقا بەرەدى. 2019 جىلدىڭ 23 اقپان كۇنى قالالىق ەكونوميكالىق سوت ارىزدانۋشىنىڭ ارىزىن قاناعاتتاندىرماي تاستايدى. زاڭسىز سالىپ قويعان قۇرىلىسىنىڭ بۇزىلۋ قاۋپى تونگەن سوڭ، «روسيمپورتتسەمەنت» جوعارى ينستانتسياعا شاعىمداندى. اپپەلياتسيالىق القا قالالىق سوتتىڭ شەشىمىن بۇزىپ، ساۋلەت باسقارماسىنا قۇرىلىس جۇرگىزۋ رۇقساتىن بەرۋدى مىندەت دەيدى.
وسى جانە بۇدان وزگە زاڭسىزدىقتار تۋرالى تومەنگى ۆيدەودا:
