2025 جىلدىڭ العاشقى جارتىجىلدىعىندا ەلىمىزدىڭ اقپارات سالاسىندا بىرقاتار ماڭىزدى وزگەرىس بولدى. بۇل تۋرالى مادەنيەت جانە اقپارات مينيسترلىگىنىڭ ءباسپاسوز قىزمەتى مالىمدەدى، دەپ حابارلايدى «ادىرنا» ءتىلشىسى.
مينيسترلىكتىڭ حابارلاۋىنشا، مەديا سالاسىنىڭ باستى باعىتتارىنىڭ ءبىرى — زاڭسىز كونتەنتپەن كۇرەس. جىل باسىنان بەرى ينتەرنەت كەڭىستىگىنەن 74 مىڭنان استام قۇقىققا قايشى ماتەريالانىقتالعان. ولاردىڭ 36 مىڭنان استامى جويىلعان. ونلاين پلاتفورمالاردا تارالعان 49 مىڭنان اسا زاڭسىز ماتەريالدىڭ 12 مىڭى وشىرىلگەن.
سونىمەن قاتار باق رەەسترى جاڭارتىلىپ, ەلىمىزدە جۇمىسىن توقتاتقان 140 اقپارات قۇرالى تىركەۋدەن شىعارىلعان. قازىرگى تاڭدا رەسپۋبليكادا 4 871 باق تىركەلگەن. ونىڭ ىشىندە 3 002 باسىلىم، 236 تەلەارنا، 98 راديو جانە 1 231 ونلاين-باسىلىم بار.
اقپارات سالاسىنداعى تاعى ءبىر جاڭالىق — وتاندىق تەلەونىمدەردىڭ حالىقارالىق جوبالار ارقىلى دامۋى. تۇركيا، قىتاي جانە رەسەيمەن بىرلەسكەن تەلەحيكايالار مەن دەرەكتى فيلمدەر ءتۇسىرىلىپ، كورەرمەنگە جول تارتتى. اتاپ ايتقاندا، «Qazaqstan» ارناسى مەن تۇركيالىق «Kanal D» ارناسى بىرىگىپ، 100 سەريالى «قايتا ورالعان ءۇمىت» تەلەحيكاياسىن دايىنداپ جاتىر.
مينيسترلىك مالىمەتىنشە، حالىقارالىق Euronews ارناسىمەن دە تىعىز ىنتىماقتاستىق ورناعان. ارنايى جوبالار اياسىندا ونداعان حالىقارالىق رەپورتاج بەن باعدارلامالار جارىق كورگەن. سونىمەن قاتار Euronews Academy باستاماسىمەن قازاقستاندا مەدياترەنينگتەر ۇيىمداستىرىلىپ، جاس جۋرناليستەرگە كاسىبي كۋرس ۇسىنىلعان.
بۇدان بولەك، تۇرعىنداردى وتاندىق كونتەنتكە قولجەتىمدى ەتۋ ماقساتىندا «سۇر تاباقشالارعا» بالاما رەتىندە وتاندىق سپۋتنيك اپپاراتتارىن سۋبسيديالاۋ باعدارلاماسى ىسكە قوسىلدى. قازىرگى تاڭدا ءۇش وبلىستا 300-دەن اسا تۇرعىن قۇرىلعىلاردى جەڭىلدىكپەن ساتىپ العان.
«اقپاراتتىق قاۋىپسىزدىك، ساپالى كونتەنت جانە حالىقارالىق ىنتىماقتاستىق – قازىرگى مەدياساياساتتىڭ باستى باعىتتارى. ءبىز وتاندىق باق-تى قولداۋدى جالعاستىرامىز»، — دەلىنگەن مينيسترلىكتىڭ حابارلاماسىندا.
