VI دۇنيەجۇزىلىك كوشپەندىلەر ويىندارىنىڭ جەڭىمپازى توڭىرەگىندەگى پىكىرتالاستاردان كەيىن قىرعىزستان تاراپى جارىستاردا رەسمي مەدالدىق جانە جالپىكوماندالىق ەسەپ جۇرگىزىلمەيتىنىن مالىمدەدى. بۇعان دەيىن قازاقستان مەن ۇيىمداستىرۋشىلار جەڭىپ الىنعان جۇلدەلەر سانى بويىنشا ءارتۇرلى مالىمەت ۇسىنعان بولاتىن، دەپ حابارلايدى «ادىرنا» ءتىلشىسى.
تۇسىندىرمەنى قىرعىزستاننىڭ دەنە شىنىقتىرۋ جانە سپورت جونىندەگى مەملەكەتتىك اگەنتتىگى Instagram جەلىسىندە جاريالادى.
«دۇنيەجۇزىلىك كوشپەندىلەر ويىندارىنىڭ تۇجىرىمداماسىنا سايكەس ەلدەر اراسىندا رەسمي مەدالدىق جانە جالپىكوماندالىق ەسەپ جۇرگىزىلمەيدى. ويىنداردىڭ باستى ماقساتى – مەملەكەتتەردىڭ جالپى رەيتينگتەگى ورىن ءۇشىن باسەكەلەسۋى ەمەس، ورتاق تاريحي-مادەني مۇرا توڭىرەگىندە بىرىگۋى جانە ەتنوسپورتتى دامىتۋ»، – دەلىنگەن حابارلامادا.
ەسكە سالايىق، بۇعان دەيىن تۋريزم جانە سپورت مينيسترلىگى ۇلتتىق قۇرامانىڭ ءبىرىنشى ورىن العانىن جازعان ەدى. مينيسترلىك دەرەگىنشە، قازاقستاندىق سپورتشىلار 74 مەدال جەڭىپ الدى. ونىڭ ىشىندە 32 التىن، 20 كۇمىس جانە 22 قولا جۇلدە بار.
ۆەدومستۆو بارلىق سپورت ءتۇرى بويىنشا ناتيجەلەر قايتا تەكسەرىلگەنىن اتاپ ءوتتى. قورىتىندى تەكسەرۋدەن كەيىن دە قازاقستان قۇراماسىنىڭ التىن مەدال سانى وزگەرمەي، 32 بولىپ قالدى.
ال دۇنيەجۇزىلىك كوشپەندىلەر ويىندارىنىڭ ۇيىمداستىرۋشىلارى قورىتىندى كەستەنىڭ باسقا نۇسقاسىن جاريالاعان. وندا 30 التىن مەدال ەنشىلەگەن قىرعىزستان ءبىرىنشى ورىندا كورسەتىلگەن. قازاقستان 29 التىن مەدالمەن ەكىنشى ورىنعا جايعاسسا، ءۇشىنشى ورىن جەتى التىن مەدال جەڭىپ العان رەسەي قۇراماسىنا بەرىلگەن.
ايتا كەتەيىك، VI دۇنيەجۇزىلىك كوشپەندىلەر ويىندارى قىرعىزستاندا 2026 جىلدىڭ 31 تامىزى بەن 6 قىركۇيەگى ارالىعىندا وتكەن بولاتىن. جارىستارعا ءۇش مىڭعا جۋىق سپورتشى قاتىسقان. باعدارلاماعا ۇلتتىق جەكپە-جەك، ات سپورتى سايىستارى، زياتكەرلىك ويىندار جانە وزگە دە ءداستۇرلى سپورت تۇرلەرى ەنگىزىلگەن.
