قازاقستان قۇراماسى اۋستراليادا وتكەن الەمدەگى ەڭ بەدەلدى پاندىك جارىستاردىڭ ءبىرى – ماتەماتيكادان حالىقارالىق وليمپيادادا (IMO-2025) جوعارى ناتيجە كورسەتتى، دەپ حابارلايدى “ادىرنا” ۇلتتىق پورتالى.
بۇل جارىسقا 112 ەلدەن كەلگەن 650-گە جۋىق ۇزدىك جاس ماتەماتيك قاتىسقان.
وليمپيادا قورىتىندىسى بويىنشا قازاقستاندىق وقۋشىلار ءتورت كۇمىس، ەكى قولا مەدالجەڭىپ الدى.
كۇمىس جۇلدە يەگەرلەرى – الماتى قالاسىنداعى Haileybury Almaty مەكتەبىنىڭ وقۋشىلارى ميرون يۋركەۆيچ (12-سىنىپ) پەن اميرلان امانجولوۆ (11-سىنىپ), استانا قالاسىنداعى Spectrum International School مەكتەبىنىڭ 11-سىنىپ وقۋشىسى مارعۇلان شارەل جانە الماتىداعى رەسپۋبليكالىق فيزيكا-ماتەماتيكا مەكتەبىنىڭ 11-سىنىپ وقۋشىسى امير ساحيپوۆ. قولا مەدالدى الماتى قالاسىنداعى Nurorda مەكتەبىنىڭ 10-سىنىپ وقۋشىسى ەراسىل التىنبەك پەن اقتوبە وبلىسىنداعى ء«بىلىم-يننوۆاتسيا» ليتسەي-ينتەرناتىنىڭ 11-سىنىپ وقۋشىسى ەرقانات كەڭشىلىك جەڭىپ الدى.
ۇلتتىق قۇرامانىڭ عىلىمي جەتەكشىلەرى – PhD دوكتورى اسىلبەك يساحوۆ پەن حالىقارالىق وليمپيادالاردىڭ جەڭىمپازى قانات ساتىلحانوۆ.
ماتەماتيكادان حالىقارالىق وليمپيادا – الەمدەگى ەڭ بەدەلدى پاندىك جارىستاردىڭ ءبىرى. IMO وليمپياداسى 1959 جىلدان بەرى وتكىزىلىپ كەلەدى جانە ول International Science Olympiads دەپ اتالاتىن جەتى پاندىك حالىقارالىق وليمپيادانىڭ قاتارىنا كىرەدى. قازاقستان بۇل جارىسقا 1993 جىلدان باستاپ قاتىسىپ كەلەدى. وسى ۋاقىت ارالىعىندا ۇلتتىق قۇراما 16 التىن، 55 كۇمىس، 81 قولا مەدال جانە 29 قۇرمەت گراموتاسىن يەلەنگەن.
