16 شىلدە كۇنى الماتىدا جاڭادان سالىنعان گاز قۇبىرىنا سىناق جۇرگىزۋ كەزىندە جەر استىندا گاز جارىلىپ، ەكى ادام جاراقات الدى، دەپ حابارلايدى "ادىرنا" ۇلتتىق پورتالى.
جارىلىس ساتىندە زارداپ شەككەندەر كولىكتىڭ ىشىندە وتىرعان. جارىلىستىڭ قاتتى كۇشىنەن كولىك اۋاعا ۇشىپ، اۋدارىلىپ كەتكەن. ەكى ازامات الماتىداعى قالالىق ورتالىق كلينيكالىق اۋرۋحاناعا جەتكىزىلدى.
الماتى قالالىق قوعامدىق دەنساۋلىق ساقتاۋ باسقارماسىنىڭ مالىمەتىنشە، تەكسەرۋ ناتيجەسىندە پاتسيەنتتەرگە «جۇمساق تىندەردىڭ سوعىلۋى» دياگنوزى قويىلعان. ولاردىڭ جاعدايى تۇراقتى، اۋرۋحاناعا جاتقىزۋدى قاجەت ەتپەيدى. زارداپ شەككەندەر امبۋلاتوريالىق ەم قابىلدايدى.
QazaqGaz Aimaq اق-نىڭ مالىمەتىنشە، جارىلىس ورتا قىسىمدى جەراستى گاز قۇبىرىنا سىناق جۇرگىزۋ كەزىندە ورىن العان. جۇمىستى مەردىگەر ۇيىم – «سانتەحكومپلەكتگرۋپپ» جشس جۇرگىزىپ جاتقان. الدىن الا اقپارات بويىنشا، اۋا قوسپاسى سىرتقا شىعىپ كەتكەن.
قازىرگى ۋاقىتتا وقيعا ورنىندا تەكسەرۋ جۇمىستارى جۇرگىزىلىپ جاتىر. تەرريتوريا قورشاۋعا الىنىپ، تۇرعىندارعا قاۋىپ جوق ەكەنى حابارلاندى.
