ءنۇرالى اليەۆ الماتى تاۋلارىندا رۋحانيات جايلى كەزدەسۋ وتكىزدى، دەپ حابارلايدى "ادىرنا" ۇلتتىق پورتالى.
الماتى ماڭىنداعى تاۋدا تاڭعى ۋاقىتتا ۇيىمداستىرىلعان بەيرەسمي كەزدەسۋدە ءنۇرالى اليەۆ رۋحانيات، ماحاببات جانە ادامنىڭ ىشكى جاي-كۇيى تۋرالى پىكىر بىلدىرگەن.
كەزدەسۋگە قاتىسۋشىلار كۇننىڭ شىعۋىن تاماشالاپ، گورەلنيك اۋماعىندا شومىلىپ، كەيىن اشىق فورماتتا اڭگىمە جۇرگىزگەن. اليەۆ ءوز سوزىندە جيىننىڭ ساياسي استارى جوق ەكەنىن اتاپ ءوتتى:
«مۇندا ەشقانداي ساياسات جوق. بۇل – تازا رۋحانيات تۋرالى اڭگىمە».
بەلسەندى سوزىندە ماحابباتتى «قۇدايدىڭ ۆيبراتسياسى» دەپ سيپاتتاپ، ادامنىڭ ءوزىن جان رەتىندە تانۋى شارتسىز سۇيىسپەنشىلىك پەن جاراتقانمەن بىرلىككە باستايدى دەگەن ويىمەن ءبولىستى. سونىمەن قاتار، جوبانىڭ فيلوسوفياسى قازاق رۋحاني ويىمەن ۇندەس ەكەنىن ايتىپ، ونى اباي قۇنانبايۇلى ەڭبەكتەرىندەگى كوزقاراستارمەن سالىستىردى.
اليەۆ ءبىلىم بەرۋ جۇيەسىنە دە سىن ايتىپ، مەكتەپتەر مەن جوعارى وقۋ ورىندارىندا ادامنىڭ تابيعاتىن، ىشكى الەمىن تۇسىنۋگە جەتكىلىكتى كوڭىل بولىنبەيتىنىن جەتكىزدى.
ايتا كەتەيىك، ءنۇرالى اليەۆ – قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ جيەنى.
