المالى اۋدانىنىنىڭ تۇرعىندارى «حالىق قاتىساتىن بيۋدجەت» جوباسىنا  42 ءوتىنىم بەرگەن

1819
Adyrna.kz Telegram

پرەزيدەنت قاسىم-جومارت توقاەۆ ءوزىنىڭ « ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى قازاقستان حالقىنا جولداۋىندا:  «حالىق قاتىساتىن بيۋدجەت» جوباسى ءتيىمدى ىسكە اسىرىلىپ جاتىر. ونىڭ اۋقىمىن كەڭەيتىپ، جوباعا اۋداندىق ماڭىزى بار قالالار مەن اۋىلداردى تارتۋ كەرەك.  تۇرعىن-ءۇي كوممۋنالدىق شارۋاشىلىعى قارجىسىنىڭ كەمىندە 10 پايىزى قايدا جۇمسالاتىنىن قوعامنىڭ ءوزى ايقىنداۋعا ءتيىس. وسى ايتىلعان ماسەلەلەردى ءتيىمدى جۇزەگە اسىرۋ ءۇشىن جاڭا بيۋدجەت كودەكسىن قابىلداۋ قاجەت، دەپ ايتقان بولاتىن.

بۇگىنگى كۇنى الماتىنىڭ المالى اۋدانىندا اتالعان جوباعا باسىم نازار اۋدارىلۋدا. قۋانتارلىعى سول تۇرعىنداردا ات سالىسىپ، ءوز ۇسىنىستارىن بەرۋ ۇستىندە. ماسەلەن،  بيىل المالىلىق تۇرعىنداردان 42 اۋلانى اباتتاندىرۋعا ءوتىنىم كەلىپ تۇسكەن. تىزىمدەگى مەكەن-جايلاردىڭ باسىم كوپشىلىگى ءبىراز جىلدان بەرى جوندەۋ كورمەپتى. ەسكى تۇرعىن ءۇي اۋلالارىنا جەرگىلىكتى اكىمدىك سوڭعى جىلدارى كوڭىل بولە باستاعان. ناتيجەسىندە بالالار وينايتىن الاڭدار مەن سكۆەرلەر ورناتىلىپ، جارىق باعاندارى پايدا بولدى.

بۇل – شاگابۋددين مەن چايكوۆسكي كوشەلەرى بويىندا ورنالاسقان تۇعىن ءۇي اۋماعى. المالى اۋدانىنا قاراستى مەكەن جايدا بيىل قۇرىلىس قارقىندى ءجۇردى. سپورت قۇرىلعىلارى ورناتىلىپ، الاڭدارعا رەزەڭكە جابىن توسەلدى. بالالار وينايتىن اۋلالار شارباقتارمەن قورشالدى. دەسە دە مۇنىڭ ءبارى جەرگىلىكتى اكىمدىكتىڭ جىلداعى جوسپارلى جۇمىسى. بۇدان بولەك، اۋداندا «حالىق قاتىساتىن بيۋدجەت» باعدارلاماسى اياسىندا دا شارۋا جاسالدى.

«بيىل بىزدە 42 اۋلانىڭ ىشىنەن 5 اۋلا تاڭدالىپ الىنىپ، كۇردەلى جۇمىستان وتكىزىلدى. سونداي-اق «حالىقتىڭ بيۋدجەتكە قاتىسۋ» باعدارلاماسى ارقىلى 21 اۋلاعا جۇمىس جۇرگىزىلىپ، تۇرعىندار وزدەرىنىڭ ريزاشىلىعىن ءبىلدىرىپ جاتىر»، –دەدى المالى اۋدانى كوممۋنالدىق شارۋاشىلىق ءبولىمىنىڭ باسشىسى رۋسلان ايتانوۆ.

وسىلايشا اينالا جاڭاشا تۇرلەنىپ، بوس جاتقان جەرلەردىڭ كوركى كەلىستى. بالالار مەن ەگدە جاستاعى زەينەتكەرلەر قۋانىشىندا شەك جوق. جەرگىلىكتى اكىمدىك وكىلدەرى جوبانى باستاماس بۇرىن تۇرعىنداردىڭ تالاپ-تىلەگىن تىڭدايدى. تيىسىنشە ورىندىقتار مەن بالالار الاڭى كوپشىلىكتىڭ تالعامىنا قاراي ورناتىلعان.

«چايكوۆسكي كوشەسىندە تۇرعانىمىزعا 48 جىل بولدى. سول ۋاقىتتان بەرى اۋلامىزدا تەك بالالار الاڭى بولاتىن. قازىر دالاعا شىققاندا دەمالاتىنداي جاعداي جاساپ بەردى»، – دەدى المالى اۋدانىنىڭ تۇرعىنى كەنجەتاي باراقباەۆا.

«اۋلانى اباتتاندىرۋ جۇمىستارىنىڭ تۇرعىندارمەن كەڭەسە وتىرىپ جۇرگىزىلگەنى قۋانتادى. ءبارىمىز كورشىلەر بولىپ شىعىپ، دەمالىپ سەرۋەن قۇرۋىمىز ءۇشىن قاجەتتى دۇنيەمىزدى ايتامىز. اۋدان اكىمدىگى سول جوسپار بويىنشا جۇمىس جۇرگىزەدى»، – دەدى المالى اۋدانىنىڭ تۇرعىنى ەلەنا ۆاۆۋليدي.

جاۋاپتىلار مۇنداي جۇمىستاردىڭ كەلەر جىلى دا جالعاساتىنىن ايتتى. جالپى تۇرعىندار تاراپىنان بيىل 42 جوباعا ءوتىنىم كەلىپ تۇسسە، سونىڭ بەسەۋى اياقتالدى. قالعان 37 جوبا الداعى جىلعا جوسپارلانعان.

پىكىرلەر