قازاقستان مەديتسيناسىنىڭ اڭىز تۇلعاسى ومىردەن ءوتتى

كورنەكتى دارىگەر، عالىم جانە پەداگوگ نينا قايۋپوۆا ومىردەن ءوتتى، دەپ حابارلايدى "ادىرنا" ۇلتتىق پورتالى.

بۇل تۋرالى سانجار اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتى وزدەرىنىڭ الەۋمەتتىك جەلىدەگى پاراقشاسىندا جازدى.

نينا قايۋپوۆا – قازاقستانداعى اكۋشەرلىك-گينەكولوگيالىق قىزمەتتىڭ قالىپتاسۋىنا زور ۇلەس قوسقان مەديتسينا سالاسىنىڭ ءىرى وكىلى.

ول – اكۋشەرلىك، گينەكولوگيا جانە پەريناتولوگيا عىلىمي ورتالىعىنىڭ نەگىزىن قالاۋشىلاردىڭ ءبىرى.

ءوزىنىڭ كاسىبي جولىندا 30 مىڭنان استام ءسابيدىڭ دۇنيەگە كەلۋىنە كومەكتەسىپ، 25 عىلىم دوكتورى مەن 40 عىلىم كانديداتىن دايىنداعان. 19 مونوگرافيا مەن 400-دەن استام عىلىمي ماقالانىڭ اۆتورى اتانعان نينا امىرقىزى سوڭعى جىلدارى دا عىلىمنان قول ۇزبەي، باس عىلىمي قىزمەتكەر جانە كاسىبي جۋرنالدىڭ باس رەداكتورى رەتىندە ەڭبەك ەتكەن.

ۋنيۆەرسيتەت ۇجىمى مارقۇمنىڭ تۋعان-تۋىستارىنا قايعىرىپ كوڭىل ايتا وتىرىپ، ونىڭ ەسىمى قازاقستان مەديتسيناسى تاريحىندا ماڭگى قالاتىنىن اتاپ ءوتتى.

قوشتاسۋ ءراسىمى 16 شىلدە كۇنى ساعات 10:00-دە Concordia تەاترىندا ءوتتى.