ءبىز قانداي ەلمىز؟
كەشە جامال جامانباەۆا تەرگەۋ يزولياتورىنان اۋرۋحاناعا جەتكىزىلدى. بۇعان جامالدىڭ دەنساۋلىعىنىڭ كۇرت ناشارلاۋى سەبەپ. 19. 03. 21. كۇنى ءوز قولىمەن جازعان حاتىندا 5 - ءشى ناۋرىزدا جۇرەك تۇسىنىڭ شانشۋى ۇدەگەنىن، التىسىندا اسقىنىپ جەدەل جاردەم شاقىرۋدى سۇراعانىن، بىراق سۇرانىسى ورىندالماعانى، 7-ءسى كۇنى ىشتەگى دارىگەر تەك قان قىسىمىن ولشەۋمەن شەكتەلگەنىن جازعان. ارادا ەكى اپتا وتكەندە 18 - ىندە ۋزي، ەكگ جاسالعان. بىراق ونىڭ ناتيجەسىن دە كورسەتپەگەن. حات 19- شى ناۋرىزدا جازىلعانىن ايتتىق. ونشاقتى كۇن جان اۋرۋى مەن ءتان اۋرۋىنىڭ ازابىن كورگەن.
بۇل بىزدەگى پوگون تاققان ادام كەيپىندەگىلەردىڭ دەگەنىنە جەتۋ ءۇشىن قانداي دا ارەكەتكە بارۋدان تايىنبايتىنىنا دالەل. دەمەك ارادا وتكەن ونشاقتى كۇندە جامالدىڭ جاعدايى جاقسارماعان. قازىر ول جاتقان پالاتا قاتاڭ كۇزەت باقىلاۋدا. ەشكىمدى وعان قاتىستىرمايدى، جولاتپايدى. وتىزىنشى جىلدارداعى گپۋ، نكۆد تۇسىنداعى "حالىق جاۋلارىنىڭ" دا تۋىس- جاقىندارىمەن كەزدەسۋ مۇمكىندىگى بولعان.
وسىعان بايلانىستى ساۋالدار بار. ماڭعىستاۋدىڭ اكىمشىلىگىنىڭ، زاڭ ورىندارىنىڭ بولماسا دەنساۋلىق سالاسىنداعى شەنۋنىكتەرى نەمەسە ءباسپاسوز قىزمەتتەرى نەگە مالىمەت بەرۋگە قۇلىقسىز؟ قوعامدا رەزونانس تۋعىزىپ وتىرعان ماسەلەنى جاريا ەتۋ نەگىزگى مىندەت. ولاي بولسا بۇلار نەگە دارمەنسىز؟ بۇعان ءبىر عانا جاۋاپ بار. ول - بىزدە بيلىك پەن حالىقتىڭ ەكى پوليۋس، ەكى دۇنيەدە ەكەندىگى. قۇلىقسىزدىق، مەرەزدىك، جالتاقتىق، مانساپقورلىق، جاعىمپازدىق تۇپتەپ كەلگەندە بەيشارالىق، ساتقىندىققا اكەلەدى. جاسىرىپ كەرەگى نە؟ ءبىز وسىعان جەتتىك. بويىمىزدا قىزدىڭ كوز جاسىنا، قارىنداستىڭ مۇڭىنا، انانىڭ زارىنا قۇلاق ءتۇرۋ، جاناشىرلىق، ينەنىڭ جاسۋىنداي بولسا دا سەلت ەتۋ قاسيەتتەرىنەن ايىرىلعانبىز.
بۇرىن ورىستان كورەتىنبىز. ورىس دەمەكشى، ولار بيلەگەن تۇستا از دا بولسا ادىلدىك بولدى. جازعانىڭنان ناتيجە شىعاتىن. 1989 جىلى بەينەۋ روۆد- سىنا ب. سپاتاەۆ دەگەن مايور باسشىنىڭ ورىنباسارى بولىپ كەلدى. ءتىلى اششى، بىلاپىت، اركىمگە ءتيىسىپ، قۇتىرىپ ءجۇردى. بىردە كەشكىسىن جولداستارمەن كينوعا بارسام، اركىمگە ءتيىسىپ بوقتاپ ءجۇر ەكەن. كوپشىلىك ورىن ەكەنىن ايتىپ ەدىم، ورەكپىپ جاعاما جارماستى. ەل قاراپ تۇر. كيكىلجىڭنەن كەيىن ارتىنشا مەن مەديتسينالىق پەرسونالدان ادام شاقىرتتىم. ەرتەڭگى كۇنى ساۋ ەكەنىمدى دالەلدەۋ ءۇشىن. كەيىننەن ونىمەن جاۋلاسىپ جۇرگەن اعا تەرگەۋشىنىڭ ماسكەۋگە كسرو باس پروكۋرورى سۋحارەۆكە جازعان ارىزىن دۇرىستادىم. ەكى ايدا ىشكى ىستەر سالاسىنان شەتتەتىلىپ، بۇكىل شەنىنەن ايىرىلىپ ءىستى بولدى.
قازىر سول كەز بولسا مىنا جوقتان بار قۇراپ، زەڭبىرەكپەن تورعاي اتىپ جۇرگەن "مىقتىلارمەن" ءسوز باسقا بولار ەدى. ەندى جامالدى قاراپ جاتقان دارىگەرلەردىڭ گيپپوكراتتىڭ انتىنا ادالدىعى، ورگاندار تاراپىنان بولاتىن قىسىمعا قاراماي جاسالار قورىتىندىسى قاجەت.
جامالدىڭ ىسىنە قاتىستى توقاەۆقا حات دايىنداۋدامىن. ونى جەلىدە جاريالاۋدىڭ پايداسى جوق. ءسىرا، وقىمايتىندىقتان قولىنا تىكەلەي تابىستاۋدىڭ رەتىن كەلتىرۋ كەرەك. ەكىنشى - ماسەلە، ول - باۋىزدالار توقتى دا تۇياعىن سەرپيدى. ەل ەكەنىمىز راس بولسا وندا حالىقتىڭ قولداۋىنا سۇيەنەمىز.
ء"ۇش قيان" باسپاسىنىڭ ديرەكتورى
ماحمۋت قوسمامبەتوۆ
