تۇركىستان وبلىسى ورداباسى اۋدانى تەمىرلان اۋىلىنىڭ تۇرعىنى اقجول نياز 12 جىل بۇرىن تۇرعىن ءۇي الۋ كەزەگىنەن زاڭسىز شىعارىلعان. ونىڭ زاڭدى وكىلى، تۋعان ءىنىسى دانيل نياز جاعدايدىڭ انىق-قانىعىن ءبىلۋ ءۇىشن پروكۋراتۋراعا شاعىم ءتۇسىردى. بۇل تۋرالى Otyrar پورتالى جازدى، دەپ حابارلايدى "ادىرنا".
اقپاراتقا سايكەس، بءىرىنشى توپتاعى مۇگەدەك اقجول نياز 2013 جىلى ءۇي كەزەگىنە تۇرعان. بىراق ويدا جوقتا ءوزىنىڭ زاڭسىز كەزەكتەن شىعارىلعانىن ءبىلدى.
“وتكەن جىلدان بەرى تەمىرلاندا ۇيلەر سالىنا باستاعانىن ەستىپ اكىمدىككە باردىم. سۇراعانىمدا ولار اعامدى تۇرعىن ءۇي كەزەگىنەن الىپ تاستاعانىن ايتتى. “نەلىكتەن؟” دەگەن سۇراعىما، “ونىڭ اتىنا تىركەلگەن ءۇيى بار” دەپ جاۋاپ بەردى. بىراق بۇل شىندىققا جاناسپايدى”، – دەيدى دانيل نياز.
اعاسىنىڭ تەگىن تۇرعىن ءۇي الۋ قۇقىعىن قورعاۋ ءۇشىن دانيل نياز پروكۋراتۋراعا شاعىممەن جۇگىندى. قاداعالاۋ ورگانى تەكسەرۋ جۇرگىزدى.
“جۇرگىزىلگەن تەكسەرۋ ناتيجەسىندە ازاماتتىڭ زاڭسىز كەزەكتەن شىعارىلعانى انىقتالدى. وسىعان بايلانىستى ءتيىستى ۇسىنىس ەنگىزىلىپ، تۇرعىن ءۇي ءبولىمى باسشىسى مەن جاۋاپتى قىزمەتكەر قاتاڭ تارتىپتىك جاۋاپكەرشىلىككە تارتىلدى. ناتيجەسىندە كەزەك قايتا قالپىنا كەلتىرىلىپ، اقجول نيازوۆقا پاتەر بەرىلدى”، – دەپ حابارلادى تۇركىستان وبلىسىنىڭ پروكۋراتۋراسى.
2025 جىلدىڭ العاشقى جارتى جىلدىعىندا 15 400-دەن استام مۇگەدەكتىگى بار ازامات قۇقىقتارى بۇزىلعانى تۋرالى شاعىم ءتۇسىرىپ، تۇركىستان وبلىسىنىڭ پروكۋراتۋراسىنا جۇگىندى. پروكۋرورلىق قاداعالاۋ ناتيجەسىندە ولاردىڭ قۇقىقتارى قورعالدى. جالپى وڭىردە 100 مىڭنان استام مۇگەدەكتىگى بار ادام تۇرادى.
