پروكۋراتۋرا ءبىلىم ءبولىمىنىڭ بىلىقتارىن تەكسەرىپ، مەكتەپتەرگە كومىر قاراجات بولىنبەگەنىن انىقتادى، دەپ جازادى otyrar.kz. سالدارىنان مىڭداعان وقۋشى سۋىق سىنىپتاردا ساباق وقۋعا ءماجبۇر.
جەلتوقسان جانە قاڭتار ايلارىندا وقۋشىلار ۋاقىتشا باسقا مەكتەپتەرگە اۋىستىرىلىپتى. جىلۋدى قامتاماسىز ەتۋگە جاۋاپتى ادامدار جوسپار بويىنشا مەكتەپ گازبەن جىلىتىلۋى كەرەكتىگىن جەتكىزدى. الايدا، قۇجاتتار ۋاقىتىلى دايىندالماعاندىقتان، وقۋ ورنى ءبىلىم بەرۋ ماۋسىمى باستالعاندا گازسىز دا، كومىرسىز دە قالعان.
بۇعان قاتىستى جاۋاپتى ماماندار جاۋاپ بەردى:
- "جەتىساي اۋداندىق ادامي الەۋەتتى دامىتۋ ءبولىمىنىڭ قىزمەتكەرلەرى، ەكونوميستەر مەن بۋحگالتەرلەر تارتىپتىك جاۋاپكەرشىلىككە تارتىلدى. قازىرگى ۋاقىتتا بارلىق كەمشىلىكتەر جويىلدى، بۇگىندە بارلىق بەس مەكتەپ قاتتى وتىنمەن تولىقتاي قامتاماسىز ەتىلدى", - دەدى جەتىساي اۋدانى پروكۋرورىنىڭ ورىنباسارى رىسبەك ەرنازاروۆ.
كۇننىڭ كۇرت سۋىنا بايلانىستى ءوڭىر مەكتەپتەرىندە كومىر قورى تەز تاۋسىلا باستاعان. قۇقىق قورعاۋ ورگاندارى ارنايى ارالاسىپ، كىلتيماننىڭ شەشىمىن تابۋعا، جاعدايدى تۇراقتاندىرۋعا مۇرىندىق بولدى.
"ادىرنا" ۇلتتىق پورتالى
