اباي وبلىسىندا ابايدىڭ 180 جىلدىعىنا ارنالعان ونكۇندىك مەرەيتويلىق شارالار لەگى جالعاسۋدا. بۇگىن ونكۇندىكتىڭ ەكىنشى كۇنىندە سەمەي قالاسىنداعى «ارەنا» مادەني-سپورتتىق كەشەنى اۋماعىندا تۇركىستان وبلىسىنىڭ مادەني كۇندەرى باستالدى. ەكى كۇنگە سوزىلاتىن بۇل ءىس-شارا قوس وبلىس اراسىنداعى ىنتىماقتاستىق نەگىزىندە وڭتۇستىك وڭىردەن تويعا تارتۋ رەتىندە ۇيىمداستىرىلىپ وتىر.
مادەني كۇندەر اياسىندا اۋىل شارۋاشىلىعى ونىمدەرىنىڭ جارمەڭكەسى اشىلدى. تۇركىستان ءوڭىرىنىڭ تابيعي ءارى ساپالى ونىمدەرى نارىقتاعىدان تومەن باعامەن ساۋدالانىپ جاتىر. جارمەڭكەگە تۇركىستان وبلىسىنان 540 توننادان اساتىن، 40-قا جۋىق ءونىم تۇرلەرى جەتكىزىلدى. ونىڭ ىشىندە 194 توننا كارتوپ، 81 توننا باۋ-باقشا ونىمدەرى، 71 توننا جەمىس-جيدەك، 167 توننا ءسۇت ونىمدەرى، بال، شىرىن، شۇجىق، جۇمىرتقا سىندى جەرگىلىكتى قايتا وڭدەلگەن ونىمدەر بار. اسىرەسە ءدامى ءتىل ۇيىرەتىن ءمىرزاشولدىڭ قاۋىنى مەن شاردارانىڭ قاربىزىنا سۇرانىس كوپ بولدى.
تۇركىستان وبلىسىنىڭ مادەني كۇندەرى اياسىندا قولونەر شەبەرلەرىنىڭ كورمەسى دە اشىلدى. مۇندا اعاشتان، كيىزدەن، قىشتان جاسالعان بۇيىمدار، توقىما كىلەمدەر، زەرگەرلىك اشەكەيلەر مەن ءتۇرلى كادەسىيلار جۇرتشىلىق نازارىنا ۇسىنىلۋدا.
سونداي-اق مادەني كۇندەر اياسىندا كيەلى تۇركىستاننان ارنايى كەلگەن «تۇمار» ەتنو-فولكلورلىق ءانسامبلى، «فاراب» بي ءانسامبلى، «سارىن» توبى مەن ش.قالداياقوۆ اتىنداعى فيلارمونيانىڭ انشىلەرى جارمەڭكە مەن كورمەگە جينالعان جۇرتشىلىققا كوتەرىڭكى كوڭىل-كۇي سىيلاۋدا.
«بۇگىنگى شارا جوعارى دەڭگەيدە ۇيىمداستىرىلعان، حالىققا ىڭعايلى جاسالعان. قالادا تۇراتىن كوپ ادامنىڭ ساياجايى جوق، ءوز ءونىمىن وسىرمەيدى. مۇنداي جارمەڭكەلەر تۇرعىندارعا اسا قاجەت. باعالار دا قولجەتىمدى، بازارداعىدان الدەقايدا ارزان. تۇرعىندار كوپ كەلىپ جاتىر، ءبارى ريزا. وسىنداي شارالار ءجيى ءوتىپ تۇرسا دەگەن تىلەگىم بار»، – دەدى قالا تۇرعىنى ساعدات سىزدىقباەۆا.
ءىس-شارا ءوتىپ جاتقان اۋماقتا ءتورت پاۆيلوننان تۇراتىن فۋدكورت ايماعى دا جۇمىس ىستەپ تۇر.
تۇركىستان وبلىسىنىڭ مادەني كۇندەرى اياسىنداعى ۇيىمداستىرىلعان شاراعا وبلىس اكىمى بەرىك ءۋالي كەلىپ، جارمەڭكە مەن كورمەنى ارالاپ، ونەرپازداردىڭ ونەرىن تاماشالادى. اباي وبلىسىنىڭ تۇرعىندارى اتىنان تۇركىستان وبلىسىنىڭ باسشىلىعىنا، ۇيىمداستىرۋشىلارعا، بارلىق قاتىسۋشىلارعا العىسىن جەتكىزدى.
«تۇركىستان تۇركى دۇنيەسىنىڭ رۋحاني استاناسى عوي. سەمەي – الاشتىڭ العاشقى استاناسى. ەكى رۋحاني ءوڭىردىڭ باۋىرلاستىعى، ىنتىماقتاستىعى قۋانتادى. ەڭ باستىسى، مۇندا باعا قولجەتىمدى. جارمەڭكەنىڭ ۇلكەن مەرەيتويدىڭ كەزىندە ۇيىمداستىرىلعانىن حالىق جاقسى قابىلداپ جاتىر. بۇل شارا شىعىس پەن وڭتۇستىكتىڭ اراسىن جالعاعان التىن كوپىر بولدى. حالىققا قاجەت وسىنداي جارمەڭكەلەردى الداعى ۋاقىتتا دا ۇيىمداستىرۋ ءۇشىن ارىپتەسىم نۇرالحان كوشەروۆكە تۇرعىنداردىڭ ءوتىنىشىن ايتىپ، قولقا سالاتىن بولامىز» دەدى ايماق باسشىسى.
جارمەڭكەنى ۇيىمداستىرۋشىلار ونىمدەرگە حالىق تاراپىنان سۇرانىستىڭ جوعارى بولعانىن ايتتى.
«اباي ءوڭىرى، سەمەي حالقى ءبىزدى جىلى قابىلداپ جاتىر. تالاي جارمەڭكەلەردى ۇيىمداستىرىپ ءجۇرمىز. بىراق حالىقتىڭ مىناداي ىقىلاسىن ءبىرىنشى رەت كورىپ تۇرمىز. تاڭعى ساعات 7-دەن باستاپ جينالىپ، ونىمدەرىمىزدى الىپ جاتىر»، – دەدى تۇركىستان وبلىستىق اۋىل شارۋاشىلىعى باسقارماسى باسشىسىنىڭ ورىنباسارى ەرمۇحامبەت قۇرالبەكوۆ.
ايتا كەتەيىك، تۇركىستان وبلىسىنىڭ مادەني كۇندەرى ەرتەڭ دە جالعاسادى.
