قر پرەزيدەنتى قاسىم-جومارت توقاەۆ الداعى ۇلتتىق دومبىرا كۇنىمەن قۇتتىقتادى، دەپ حابارلايدى "ادىرنا" ۇلتتىق پورتالى.
"دومبىرا – ۇلت بولمىسى، حالىق قازىناسى. «قازاق – ناعىز قازاق ەمەس، ناعىز قازاق – دومبىرا». اسىرەسە، وسكەلەڭ ۇرپاقتىڭ دومبىراعا دەگەن ىقىلاسى ەرەكشە. جاستار ءتول مادەنيەتىمىزدى تەرەڭ ءتۇسىنىپ، سالت-داستۇرىمىزگە قۇرمەتپەن قارايدى. بۇل – وتە جاقسى ءۇردىس. ويتكەنى اتا-بابالارىمىزدىڭ مادەني مۇراسىن كوزدىڭ قاراشىعىنداي ساقتاۋ – ناعىز وتانشىلدىقتىڭ كورىنىسى. وتانعا سۇيىسپەنشىلىك – مەملەكەتتىلىگىمىزدىڭ تەمىرقازىعى", – دەپ جازدى پرەزيدەنت ءوزىنىڭ X پاراقشاسىندا.
مەملەكەت باسشىسى ءداستۇرلى ونەر قايراتكەرلەرىنە دە العىس ءبىلدىردى. ونىڭ ايتۋىنشا، قايرات بايبوسىنوۆ «قازاقستاننىڭ ەڭبەك ەرى»، ايگۇل ۇلكەنباەۆا مەن ايگۇل قوسانوۆا «قازاقستاننىڭ حالىق ءارتىسى» اتاعىنا يە بولدى.
"قاسيەتتى قارا دومبىرانىڭ كۇمبىرىن بۇكىل الەمگە پاش ەتىپ جۇرگەن ازاماتتارعا العىس ايتامىن", – دەدى قاسىم-جومارت توقاەۆ.
ايتا كەتەيىك، ۇلتتىق دومبىرا كۇنى شىلدە ايىنىڭ العاشقى جەكسەنبىسىندە اتالىپ وتەدى. بۇعان دەيىن ەلىمىزدە دومبىرا كۇنىنە وراي 300-گە جۋىق ءىس-شارا ۇيىمداستىرىلاتىنى حابارلانعان.
