20 اقپان كۇنى قاسىم-جومارت توقاەۆ پرەزيدەنتتىك جاستار كادر رەزەرۆىنىڭ فورۋمىنا قاتىستى، دەپ حابارلايدى "ادىرنا" ۇلتتىق پورتالى. بۇل تۋرالى قر پرەزيدەنتىنىڭ رەسمي سايتىندا ايتىلدى.
قاسىم-جومارت توقاەۆ فورۋم قاتىسۋشىلارىنىڭ الدىندا سويلەگەن سوزىندە جاستاردىڭ وسىناۋ يننوۆاتسيالىق ىزدەنىستەرىن وڭ باعالاپ، ءتيىستى مەملەكەتتىك ورگاندار تاراپىنان مۇنداي باستامالارعا قولداۋ كورسەتىلەتىنىن جەتكىزدى.
پرەزيدەنت پىكىرىنشە، مەملەكەت باسقارۋ ىسىنە ويى ۇشقىر، ءبىلىمى وزىق، سانا-سەزىمى تەرەڭ، ناعىز وتانشىل ازاماتتار كوپتەپ كەلۋى كەرەك.
"پرەزيدەنتتىك جاستار كادر رەزەرۆى ءدال وسىنداي تالاپتى جاستارعا بىرەگەي مۇمكىندىك بەرەدى. بۇگىندە رەزەرۆتە 400 مامان بار. سونىڭ 280-ءى، ياعني 70 پايىزى ورتالىق جانە جەرگىلىكتى اتقارۋشى ورگانداردا جاۋاپتى لاۋازىمدارعا تاعايىندالدى. بىرقاتارى كۆازيمەملەكەتتىك سەكتوردا جانە بيزنەس سالاسىندا ەڭبەك ەتىپ ءجۇر. وسى ورايدا مەن مەملەكەتتىك قىزمەت ىستەرى اگەنتتىگىنىڭ بۇرىنعى ءتورايىمى انار جايىلعانوۆا كەزىندە وسى باستامانى جۇزەگە اسىرۋعا مول ۇلەس قوسقانىن اتاپ وتكىم كەلەدى. قازىرگى تاڭدا ەلىمىزدە اۋقىمدى رەفورمالار جۇزەگە اسىرىلىپ جاتىر. مەملەكەتىمىزدى وركەندەتۋ ءۇشىن جاڭا، باتىل قادامدار جاسالۋدا. سوندىقتان وزدەرىڭىز سياقتى ەلىمىزدىڭ جالىندى جاستارى وسى وزگەرىستەردىڭ قوزعاۋشى كۇشىنە، مىقتى تىرەگىنە اينالۋى كەرەك دەپ سانايمىن", – دەدى قاسىم-جومارت توقاەۆ.
