رەسەي اسكەرى سەنبىگە قاراعان ءتۇنى ۋكرايناداعى ودەسسا قالاسىنا سوققى جاساۋشى دروندارمەن شابۋىل جاسادى، دەپ حابارلايدى "ادىرنا" ۇلتتىق پورتالى «ۋكراينسكايا پراۆدا» باسىلىمىنا سىلتەمە جاساپ.
سالدارىنان ەرلى-زايىپتى قازا تاۋىپ، 17 ادام جاراقات العان، ولاردىڭ ۇشەۋى – بالالار.
ودەسسا وبلىستىق اسكەري اكىمشىلىگىنىڭ باسشىسى ولەگ كيپەردىڭ ايتۋىنشا، قۇتقارۋشىلار درون شابۋىلىنان قۇلاعان تۇرعىن ءۇيدىڭ ءۇيىندىسىنىڭ استىنان قازا تاپقان ەرلى-زايىپتىلاردىڭ دەنەلەرىن الىپ شىققان.
ۋكراينا توتەنشە جاعدايلار قىزمەتىنىڭ دەرەگىنشە، رەسەيلىك دروندار 21 قاباتتى تۇرعىن ۇيگە ءتيىپ، ناتيجەسىندە 7, 8 جانە 9-قاباتتاردا ءورت شىققان. ادامدار پاتەرلەرىندە قامالىپ قالعان. قۇتقارۋشىلار ءورتتى ءسوندىرىپ قانا قويماي، ءبىر مەزگىلدە ادامداردى ەۆاكۋاتسيالاعان. قازىر جابىق جانە بۇعاتتالعان پاتەرلەردە ىزدەستىرۋ-قۇتقارۋ جۇمىستارى جالعاسۋدا.
سونداي-اق، جارىلىستار دنەپر قالاسىندا دا تىركەلدى. بۇعان دەيىن قالادا جانە وبلىس اۋماعىندا اۋە دابىلى جاريالانعان بولاتىن.
ۋكراينا قارۋلى كۇشتەرى اۋە كۇشتەرىنىڭ مالىمەتىنشە، ءبىر ءتۇن ىشىندە رەسەي اسكەرى ۋكرايناعا 23 سوققى درونىن جىبەرگەن. ولاردىڭ نەگىزگى سوققىسى ودەسسا وبلىسىنا باعىتتالعان.
