ۋكراينا پرەزيدەنتى ۆلاديمير زەلەنسكي 27 جەلتوقسان كۇنى كەشكە جاساعان ۆيدەوۇندەۋىندە رەسەيدىڭ ۋكرايناعا قارسى سوعىسىندا بىرنەشە سولتۇستىككورەيالىق ساربازدى تۇتقىنداعاندارىن مالىمدەدى، دەپ حابارلايدى "ادىرنا" ۇلتتىق پورتالى DW-گە سىلتەمە جاساپ.
"بۇگىن سولتۇستىك كورەيانىڭ بىرنەشە ساربازى تۋرالى حابارلامالار بولدى. ءبىزدىڭ اسكەري قىزمەتكەرلەرىمىز ولاردى تۇتقىندادى. بىراق ولار اۋىر جارالانعاندىقتان، ومىرلەرىن ساقتاپ قالۋ مۇمكىن بولمادى", – دەدى زەلەنسكي.
پرەزيدەنتتىڭ ايتۋىنشا، كۋرسك وبلىسىندا رەسەي تاراپىنان قولدانىلىپ جاتقان سولتۇستىككورەيالىق ساربازداردىڭ اراسىندا ۇلكەن شىعىن بار.
"رەسەيلىك اسكەري قىزمەتكەرلەر مەن سولتۇستىككورەيالىق باقىلاۋشىلار بۇل ساربازداردىڭ ءومىرىن ساقتاپ قالۋعا نيەتتى ەمەس. ءتىپتى سولتۇستىككورەيالىقتاردىڭ تۇتقىنعا تۇسپەۋى ءۇشىن ولاردى ءوز ادامدارى اتىپ ولتىرگەن جاعدايلار بار", – دەپ اتاپ ءوتتى زەلەنسكي.
بۇعان دەيىن، 26 جەلتوقساندا، ۋكراينالىق باق پەن Telegram ارنالاردا كۋرسك وبلىسىندا تۇتقىنعا الىنعان العاشقى سولتۇستىككورەيالىق ساربازدىڭ سۋرەتى جاريالانعان بولاتىن. ال 27 جەلتوقساندا وڭتۇستىك كورەيانىڭ Yonhap اقپارات اگەنتتىگى وڭتۇستىك كورەيا بارلاۋىنىڭ سولتۇستىككورەيالىق ساربازدىڭ ۋكراينالىق تۇتقىنعا تۇسكەنىن راستاعانىن حابارلادى.
وڭتۇستىك كورەيا شەنەۋنىكتەرىنە سىلتەمە جاساعان جۋرناليستەردىڭ حابارلاۋىنشا، قازىرگى ۋاقىتتا رەسەيگە شامامەن 11 000 كحدر اسكەري قىزمەتكەرلەر جىبەرىلگەن.
"سولتۇستىك كورەيادان رەسەيگە اسكەريلەر مەن اسكەري جابدىقتاردى ودان ءارى جىبەرۋگە دايىندىق بەلگىلەرى بايقالىپ جاتىر", – دەپ مالىمدەدى.
