ىستامبۇل قالاسىندا ۋكراينا مەن رەسەي دەلەگاتسيالارى اراسىندا سوعىستى توقتاتۋ جونىندەگى كەلىسسوزدەردىڭ ءۇشىنشى كەزەڭى ءوتتى، دەپ حابارلايدى "ادىرنا" ۇلتتىق پورتالى.
ناتيجەسىز كەزدەسۋ ۇزاققا سوزىلمادى.
كەلىسسوزدەر شامامەن ءبىر ساعاتقا دا جەتپەي اياقتالعان. كەلىسسوزدەن كەيىن جۋرناليستەرگە مالىمدەمە جاساعان ۋكراينا دەلەگاتسياسىنىڭ جەتەكشىسى رۋستەم ۋمەروۆ كيەۆتىڭ تامىز ايىنىڭ سوڭىنا دەيىن ۋكراينا پرەزيدەنتى ۆلاديمير زەلەنسكي مەن رەسەي پرەزيدەنتى ۆلاديمير ءپۋتيننىڭ جەكە كەزدەسۋىن ۇيىمداستىرۋدى ۇسىنعانىن جەتكىزدى.
الايدا رەسەي تاراپى ازىرگە مۇنداي كەزدەسۋ وتكىزۋگە كەلىسىم بەرگەن جوق. ءتىپتى رەسەي پرەزيدەنتى ۆلاديمير پۋتين بۇعان دەيىن ۋكراينا باسشىسى زەلەنسكيدى زاڭدى پرەزيدەنت رەتىندە مويىندامايتىنىن مالىمدەگەن بولاتىن.
سونداي-اق رۋستەم ۋمەروۆ ۋكراينا جاعى ناقتى ءارى دەرەۋ اتىستى توقتاتۋ رەجيمىنە مۇددەلى ەكەنىن، جانە وعان دايىن ەكەنىن تاعى دا قايتالادى.
رەسەي دەلەگاتسياسىن باسقارىپ بارعان ۆلاديمير مەدينسكي كەلىسسوزدەن كەيىن باسپاسوزگە بەرگەن سۇحباتىندا قوس تاراپ كەمىندە 1200 اسكەري تۇتقىندى ءبىر-بىرىمەن الماستىرۋعا كەلىسكەنىن حابارلادى.
