سىرتقى ىستەر ءمينيسترىنىڭ ورىنباسارى الىبەك باقاەۆ يندونەزيادا ەسىرتكى قىلمىسىنا قاتىسى بار دەگەن كۇدىكپەن ۇستالعان ەكى قازاقستاندىققا قاتىستى پىكىر ءبىلدىردى، دەپ حابارلايدى «ادىرنا» ءتىلشىسى.
ول قازىرگى تاڭدا يندونەزيا تارابىنىڭ ءتيىستى تەرگەۋ جۇمىستارىن جۇرگىزىپ جاتقانىن مالىمدەدى.
«قازىر بۇل ءىستى يندونەزيانىڭ قۇقىق قورعاۋ ورگاندارى قاراپ، تەرگەۋ جۇرگىزىپ جاتىر. شەشىم شىققان بويدا بىزگە رەسمي تۇردە حابارلانادى. ءوز تاراپىمىزدان ءۇنسىز وتىرعان جوقپىز، ەلشىلىك، كونسۋلدارىمىز جۇمىس ىستەپ جاتىر»،—دەدى ول.
ۆيتسە-مينيستر قازاقستان مەن يندونەزيا اراسىندا كۇدىكتىلەرمەن الماسۋ بويىنشا كەلىسىم جوق ەكەنىن جەتكىزدى.
«بۇعان دەيىن مۇنداي جاعدايلار بولعان جوق، سوندىقتان تاجىريبە تۇرعىسىنان قول قويۋعا نەمەسە قانداي دا ءبىر قۇجات قابىلداۋعا قاجەتتىلىك بولعان ەمەس. ال قازىر ونداي قاجەتتىلىك تۋىنداپ وتىر، سوندىقتان بۇل ۇدەرىس جەدەلدەيدى دەپ ويلايمىن»،— دەدى باقاەۆ.
ەسكە سالايىق، بۇعان دەيىن يندونەزيا بيلىگى ەلدە 2 ايلىق وپەراتسيا بارىسىندا ەسىرتكى ساۋداسىمەن اينالىستى دەگەن كۇدىكپەن 285 ادامنىڭ تۇتقىندالعانىن مالىمدەگەن ەدى. ۇستالعانداردىڭ اراسىندا 2 وتانداسىمىزدىڭ بار ەكەنى بەلگىلى بولدى. يندونەزيادا ەسىرتكى قىلمىسى ءۇشىن ءولىم جازاسى قاراستىرىلعان. قازىرگى كەزدە 530 ادامدىء ولىم جازاسى كۇتىپ تۇر. ونىڭ ىشىندە 96 شەتەلدىك بار.
