الماتى وبلىسىنىڭ كازتسيك اۋىلىندا پوليتسيا سينتەتيكالىق ەسىرتكى وندىرەتىن ءىرى ناركولابوراتوريانى تاراتتى، دەپ حابارلايدى “ادىرنا” ۇلتتىق پورتالى Polisia.kz سايتىنا سىلتەمە جاساي وتىرىپ.
ەسىرتكى ءوندىرىسىن ۇيىمداستىرۋشىلار الماتىدان كەلگەن جاس ەرلى-زايىپتىلار. ولار ەسىرتكى ءوندىرۋ ءۇشىن ارنايى باۋ-باقشا سەرىكتەستىگىنەن ءۇي ساتىپ الىپ، وعان زەرتحانامەن جابدىقتالعان بولمە قوسقان.
زەرتحانا تىيىم سالىنعان زاتتاردى سينتەزدەۋگە تولىق دايىندالعان: حيميالىق رەاكتسيالارعا ارنالعان اگرەگاتتار، الىنعان پرەپاراتتاردى كەپتىرۋگە ارنالعان ونەركاسىپتىك سورعىش جانە قابىرعالارى جىلۋ وقشاۋلاعىش ماتەريالدارمەن قاپتالعان.
"وتباسىلىق جۇپتىڭ قىلمىستىق ارەكەتتەرىنىڭ دالەلدەمەلەرى رەتىندە پوليتسەيلەرمەن ەكى زەرتحانالىق رەاكتور، 100 كگ سينتەزدەلگەن ەسىرتكىلىك ۇنتاق تارىزدەس زات جانە ەسىرتكىنى وندىرۋگە ارنالعان 800 ليتردەن استام پرەكۋرسور تاركىلەندى. وسىلايشا بۇل جاعدايدا قازاقستاندىق قالالاردىڭ كوشەلەرىنە باعاسى 7 ملرد تەڭگە بولاتىن، قاتتى اسەر ەتەتىن سينتەتيكالىق ەسىرتكىنىڭ 550 مىڭعا جۋىق دوزاسى جىبەرىلمەدى. توپ قۇرامىندا اسا ءىرى كولەمدە ەسىرتكى وندىرگەنى ءۇشىن ۇستالعاندارعا مۇلكىن تاركىلەي وتىرىپ، 10 جىلدان 15 جىلعا دەيىن باس بوستاندىعىنان ايىرۋ جازاسى ءتونىپ تۇر", – دەدى قر ءىىم ەسىرتكى قىلمىسىنا قارسى ءىس-قيمىل دەپارتامەنتى باستىعىنىڭ ورىنباسارى باقىتجان ءامىرحانوۆ.
2023 جىلدىڭ جەلتوقسان ايىنان باستاپ ءىىم باستاماسىمەن سينتەتيكالىق ەسىرتكى ءوندىرۋ ءۇشىن پايدالانىلاتىن قۇرالدار مەن جابدىقتاردىڭ اينالىمى ءۇشىن قىلمىستىق جاۋاپكەرشىلىك ەنگىزىلگەنى اتاپ ءوتىلدى. بۇل قىلمىس ءۇشىن 3 جىلدان 15 جىلعا دەيىن باس بوستاندىعىنان ايىرۋ جازاسى تاعايىندالادى.
”ادىرنا” ۇلتتىق پورتالى
