قوستانايدا سپورت فاكۋلتەتىندە وقيتىن ستۋدەنت ەسىرتكى تاراتقانى ءۇشىن 11 جىلعا باس بوستاندىعىنان ايىرىلدى. بۇل تۋرالى بۇگىن، 23 قىركۇيەكتە ىشكى ىستەر مينيسترلىگىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
پوليتسيا وبلىس ورتالىعىنىڭ تۇكپىر-تۇكپىرىندە ەسىرتكى تاراتۋمەن اينالىسقان ەكى ادامدى ۇستاعان بولاتىن. ولاردىڭ ءبىرى دەنە شىنىقتىرۋ فاكۋلتەتىنىڭ 4-كۋرسىندا وقىعان.
كۇدىكتىلەردىڭ جالدامالى پاتەرىن ءتىنتۋ كەزىندە 4 كەلىدەن اسا سينتەتيكالىق ەسىرتكى، ياعني ا-PVP تاركىلەندى. سونىمەن قاتار ەلەكتروندۆ تارازىلار، 240 ميني ماگنيت، ەلەكتر تاسپا، فولگا جانە ەسىرتكىنى وراۋعا ارنالعان باسقا دا قۇرىلعىلار تابىلعان.
«الىنعان پارتيانىڭ قۇنى قارا نارىقتا شامامەن 100 ميلليون تەڭگە بولادى. پوليتسەيلەر اينالىمعا 15 مىڭنان اسا دوزانىڭ جىبەرىلۋىنە جول بەرمەدى. ەسىرتكىنى اسا ءىرى مولشەردە تاراتقانى ءۇشىن سوت ۇكىمىمەن ەكەۋىنە دە 11 جىلعا باس بوستاندىعىنان ايىرۋ جازاسى تاعايىندالدى»،–دەلىنگەن حابارلامادا.
ۇكىم زاڭدى كۇشىنە ەندى.
