Threads الەۋمەتتىك جەلىسىندە رەسەيدىڭ لەنينگراد وبلىسىنا قاراستى ۋست-لۋگا اۋىلىندا قازاقستاندىقتاردىڭ جاپپاي توبەلەسكەنى تۋرالى ۆيدەو تارادى. قر سىرتقى ىستەر مينيسترلىگى وقيعاعا قاتىستى پىكىر ءبىلدىردى، دەپ حابارلايدى "ادىرنا".
ۆيدەودان توپقا ءاۆتوموبيلدىڭ كىرىپ كەتكەنىن كورۋگە بولادى. قر سىرتقى ىستەر مينيسترلىگىنىڭ ءباسپاسوز قىزمەتى حابارلاعانداي، وقيعا 2026 جىلعى 26 ناۋرىزدا «ۆەلەستروي» قۇرىلىس كومپانياسىنىڭ نىسانىندا بولعان.
«سانكت-پەتەربۋرگتەگى قر باس كونسۋلدىعى 2026 جىلعى 26 ناۋرىزدا ۋست-لۋگا پوسەلكەسىندە «ۆەلەستروي» كومپانياسىنىڭ نىسانىندا قازاقستاندىقتار قاتىسقان قاقتىعىس تۋرالى اقپاراتتى تەكسەرىپ جاتىر. العاشقى مالىمەتتەر بويىنشا، توبەلەسكەندەردى رەسەيدىڭ قۇقىق قورعاۋ ورگاندارى ۇستاعان جانە جاعدايدى انىقتاۋ ءۇشىن تەرگەۋ جۇرگىزىلىپ جاتىر. رەسەيدىڭ ءتيىستى ورگاندارىنا جانە كومپانيا باسشىلىعىنا رەسمي ساۋالدار جولداندى. ديپلوماتتار سانكت-پەتەربۋرگ جانە لەنينگراد وبلىسىنىڭ ءىىد-ىمەن بايلانىستا بولىپ، قازاقستاندىق ازاماتتاردىڭ ناقتى سانىن جانە قۇقىقتىق مارتەبەسىن انىقتاۋدا. بۇل ماسەلە مينيسترلىك تاراپىنان ەرەكشە باقىلاۋدا»، – دەلىنگەن حابارلامادا.
