انتاليادا جول اپاتىنان قازا تاپقان قازاقستاندىقتىڭ دەنەسى ەلگە جەتكىزىلدى، دەپ حابارلايدى "ادىرنا" ءتىلشىسى.
بۇل تۋرالى قازاقستاننىڭ سىرتقى ىستەر مينيسترلىگى حابارلادى.
ءسىم دەرەگىنشە، جول-كولىك وقيعاسىنان قازا تاپقان 18 جاستاعى قازاقستان ازاماتى بولعان.
ۆەدومستۆونىڭ حابارلاۋىنشا، مارقۇم انتالياداعى قوناقۇيلەردىڭ بىرىندە انيماتور بولىپ جۇمىس ىستەگەن. ول 15 ماۋسىم كۇنى جول اپاتى سالدارىنان كوز جۇمعان.
مينيسترلىكتىڭ مالىمەتىنشە، قازاقستاننىڭ انتالياداعى باس كونسۋلدىعى قاجەتتى كونسۋلدىق-قۇقىقتىق كومەكتى تولىق كولەمدە كورسەتىپ، تۇرىك تاراپىمەن بىرلەسىپ مارقۇمنىڭ دەنەسىن ەلگە قايتارۋ جۇمىستارىن ۇيىمداستىرعان.
مارقۇمنىڭ دەنەسى قازاقستانعا 17 ماۋسىمدا جەتكىزىلدى. رەپاترياتسيا جۇمىس بەرۋشى مەن سەرىكتەس ۇيىمداردىڭ قارجىلاي قولداۋىمەن جۇزەگە اسىرىلعان.
سىرتقى ىستەر مينيسترلىگى بۇل ماسەلە باس كونسۋلدىقتىڭ تۇراقتى باقىلاۋىندا ەكەنىن اتاپ ءوتتى.
